Televizioni spanjoll 101 sjell detaje tronditëse nga vrasja e shqiptarit Miklovan Danaj në Spanjë përpara disa ditësh

Krim i ri në Costa del Sol.

Më 24 gusht u gjet në Marbella trupi i pajetë i Miklovan Danajt, i njohur më shumë si ‘Keli’, anëtar i mafias shqiptare.

‘Keli’ ishte 30 vjeç dhe ishte nga Guri i Zi, Shkodër (Shqipëri). 

Lajmin e bëri publik media shqiptare të hënën, më 1 shtator. Kjo mbyll një kapitull që mbajti në ankth familjen e ‘Kelit’, i konsideruar si një person i rëndësishëm në botën e trafikut të drogës në Evropë, që nga momenti kur u zhduk më 11 maj.

Në kohën që ‘Keli’ u zhduk, familja e tij publikoi këtë mesazh: “Miklovani është i vdekur, mos e kërkoni”.

Në vendin ku u gjet trupi, policia gjeti gjithashtu dy dokumente identiteti me të dhëna të ndryshme, çka sugjeron përdorimin e identiteteve të rreme. Testet e ADN-së kanë konfirmuar identitetin e trupit të gjetur.

Burime policore kanë bërë me dije se ‘Keli’ mund të jetë rrëmbyer, sulmuar dhe ekzekutuar, për t’u hedhur më pas në det. Hetimet, që janë në zhvillim e sipër, janë fokusuar në një përplasje mes klaneve që kontrollojnë trafikun e drogës në Gadishullin Iberik.