Gazetarja investigative Klodiana Lala ka paraprirë një skandal që sipas saj pritet të ndodhë në Këshillin e Lartë Gjyqësor.

Lala akuzon nënkryetarin e Gjykatës së Lartë Sokol Sadushin për komplot në zgjedhjet e KLGJ-së, pasi në votimin për vendin vakant të Dritan Hallunaj nga gjykatat e shkallës së parë nga Tirana garonin gjyqtaret Alma Kodraliu dhe Gentiana Muça, ku kjo e fundit doli fituese me 114 vota nga 112 që siguroi Kodraliu.

Por gazetarja Lala thotë se nga burimet, Gentiana Muça, nuk e ka mbështetjen e disa anëtarëve të Gjykatës së Lartë, atyre që luajnë fijet ne sistemin e drejtësisë dhe këtë mbështetje e gëzon Alma Kodraliu, të cilën e duan në Këshill.

Sipas Lalës kjo do bëhet e mundur duke shpallur të pavlefshme një votë dhe duke kaluar kështu në rivotim.

“Mekanizmi është i thjeshtë një padi në Gjykatën Administrative, e cila siç me informojnë burimet është gati” shprehet Lala.

Postimi i Kolodiana Lalës:

Skandali që pritet të mbërthejë KLGJ (e reformuar)

Nuk do të pranoj askënd të thotë që nuk iu paralajmërova për cfarë po ndodh në atë që njihet si “qeveria e gjyqësorit”, Këshillin e Lartë Gjyqësor. Në këtë institucion po lëvizen nën rrogoz disa fije për të larguar nga Këshilli, një prej anëtarëve të sapovotuara. Pra, me pak fjalë, po konsumohet një skandal, që me gjasë do të shpërthejë së shpejti. Po ua sqaroj me pak fjalë.

Me 9 tetor 2023, u mbajt Mbledhja e Përgjithshme e Gjyqtarëve të Republikës së Shqipërisë, për zgjedhjen e tre anëtarëve të rinj të Këshillit të Lartë Gjyqësor.

Sic e do rasti, nënkryetari i Gjykatës së Lartë Sokol Sadushi, mbajti fjalën e tij. Më pas në tribunë u ngjit Naureda Llagami, Kryetare e KLGJ-së (që askush nuk e kuptoi cfarë tha).

Në vijim, kandidatët një e nga një paraqiten platformat e tyre dhe kërkuan besimin e kolegëve.

Sipas zyrës së shtypit në Gjykatën Supreme të pranishëm në Mbledhje ishin  236 gjyqtarë, nga 240 që janë në total.

Pasi shprehën vullnetin e tyre me votë, komisioni nisi numërimin.

Emona Muci rezultoi fituese me 133 vota përballë kandidatës Irida Kacerja që siguroi 92 të tilla. Ajo zuri vendin vakant nga gjytarët nga radhët e Apelit duke zëvendësuar Brikena Ukperaj.

Nga gjykatat e shkallëve të para nga rrethet, ishte në garë vetëm një kandidat; Markelian Koça që automakisht kaloi. Koça zëvendësoi Marcela Shehun.

Për vendin vacant të Dritan Hallunaj nga gjykatat e shkallës së parë nga Tirana garonin Alma Kodraliu dhe Gentiana Muça.

Në përfundim të numërimit doli fituese Gentiana Muça me 114 vota nga 112 që siguroi Alma Kodraliu. Pra, me vetëm dy vota diferencë. Gara ishte e ngushtë dhe e ethshme deri në votën e fundit.

Por, do të thoni ju ku “fle lepuri”. Po jua tregoj.

Në radhët e gjyqëqësorit thuhet se Gentiana Muça, nuk e ka mbështetjen e disa anëtarëve të Gjykatës së Lartë, atyre që luajnë fijet ne systemin e drejtësisë. Këtë mbështetje – theksojnë burimet – e gëzon Alma Kodraliu, të cilën e duan në Këshill. Por si do të bëhet e mundur kjo?

Fare thjeshtë. Duke shpallur të pavlefshme një votë dhe duke kaluar në rivotim.

Mekanizmi është i thjeshtë një padi në Gjykatën Administrative, e cila siç me informojnë burimet është gati.

Pyetjet që shtroj unë janë këto: ku ruhen kutitë me vota? Kush e garanton që në to nuk ka ndërhyrje apo heqje të ndonjë vote?

Është histori e thjeshtë, por që për mua dëshmon se në vendin tonë nuk vidhen vota për tu bërë kryebashkiakë apo deputetë, por ndërhyhet tek vota edhe kur bëhet fjalë për systemin e drejtësisë.

Po ju kujtoj një rast të freskët fare. Ambasadores Amerikane në Tiranë Yuri Kim ju desh të zbarkonte në KLP, kur votohej për kreun e ri të SPAK. Do duhej që Amerikanët të kishin zbarkuar edhe në KLGJ, ose të zbarkojnë sa nuk është vonë.

(Sqarim: Asnjë njohje personale apo interesi më zonjën Muça, madje dyshoj të vetja nëse e njoh po të jetë përpara meje në rrugë).

 Është më mirë të parandalohen skandalet, sesa të ndodhin e më pas të diskutojmë studiove.

Na rroftë drejtësia e re, nëse mblidhen edhe njëherë gjyqtarët për të ndërruar një gjyqtare me një tjetër në KLGJ. Karriera duhet të jetë meritokraci.