Policia e Shtetit ka arritur më në fund të kapë një nga mashtruesit e shumtë në rrjetet sociale, që duke u hequr si të sëmurë, zhvasin qytetarë zemërdhembshur që u dërgojnë paratë për kurim pa e verifikuar ligjërisht situatën.
Në pranga ka rënë një grua nga Elbasani, Ermira Debova, 46 vjeçe, e cila arriti të gënjente dhe t’i merrte 10 mijë euro një shtetasi nga Maqedonia e Veriut nëpërmjet rrjeteve sociale.
Policia e Elbasanit njoftoi se pas kallëzimit të një shtetasi nga Maqedonia e Veriut për një rast mashtrimi, ka vepruar menjëherë duke nisur në Prokurorinë e Elbasanit një hetim për zbulimin dhe dokumentimin e plotë ligjor të këtij rasti.
Nga provat e siguruara si rezultat i hetimit të thelluar, me metoda proaktive, u organizua operacioni i koduar “Teknika”.
Si rrjedhim, nga policia e Elbasanit u arrestua në flagrancë shtetasja Ermira Debova, 46 vjeçe, banuese në Elbasan.
46-vjeçarja e kishte mashtruar nëpërmjet rrjeteve sociale, një 32-vjeçar nga Republika e Maqedonisë së Veriut duke i prezantuar të dhëna të rreme shëndetësore dhe personale të saj. Nga kjo veprimtari kriminale dyshohet se ajo përfitoi rreth 10 000 euro.
Vijojnë hetimet për identifikimin dhe arrestimin e shtetasve të tjerë që mund të jenë implikuar në këtë rast.
© SYRI.net