Detaje të reja dalin në dritë nga operacioni i zbulimit të laboratorit të drogës në Frakull. BalkanWeb ka zbuluar fakte se çfarë roli kishin kolumbianët.

Grupi hetimor ka gjetur në laborator çdo material apo pajisje të specializuar që duhej për të bërë ndarjen nga plehu kimik të drogës. Ndërkohë, i shpalluri në kërkim, kolumbiani Zaimir Rodrigez, (i cili dyshohet se kishte ardhur në Shqipëri për të bërë ndarjen e kokainës nga plehu kimik) bashkë me dy të tjerë, janë të specializuar për ta nxjerrë lëndën narkotike nga çdo përzierje tjetër, përfshi edhe nga rrobat.

Mësohet se një prej kolumbianëve të përfshirë në këtë rrjet trafiku ishte i specializuar edhe për këtë proces, përveç ndarjes nga plehu kimik.

Këta shtetas raportohet se kanë precedentë të theksuar kriminal në vendin e tyre dhe kanë qenë në shërbim të një klani shumë të njohur në Kolumbi. Po ashtu bëhet e ditur se dy të arrestuarit janë njëri kimist dhe tjetri teknolog. Ndërsa Zaimir Rodrigez është kimist i mirëfilltë që ka punuar për klanin mafioz “Kali”.

Burime bëjnë me dije se thasët me pleh kimik të përzier me kokainë, pasi janë futur në territorin shqiptar, janë bërë disa ndryshime vendi të paktën 3 herë deri kur ka mbërritur në destinacion përfundimtar në Frakull të Fierit te porositësi, aty ku ishte edhe laboratori ku do bëhej ndarja e drogës nga plehu kimik. Grupi hetimor sqaron se gjithçka ka qenë në monitorim, hetim dhe përgjim nga autoritetet shqiptare, malazeze, DEA, por edhe nga partnerët.

Raportohet se në maj është bërë porosia dhe ngarkesa është nisur në portin Buenaventura në Kolumbi me anijen “Monte Cervino” një kontenier me pleh organik i shpërndarë në 20 paleta. Më pas ky kontejner ka bërë ndalesë në Greqi në portin e Pireut, ngarkesë që ishte në tranzit përmes Malit të Zi në portin e Tivarit, ndërsa destinacioni përfundimtar ishte Shqipëria. Ndonëse ka pasur sinjalizim nga porti, është dhënë urdhër që të mos flitet në lidhje me kontejnerin pasi ishte hetim disa mujor nga të paktën 5 agjenci ligjzbatuese të 5 vendeve të ndryshme.

Kujtojmë se të arrestuarit janë Viktor Cervanaku (ish-kryekomunar i PS punonte si drejtor në OST) Zenel Cervanaku, Denilson Cervanaku, Enxhi Ferhati, Nikolin Gjolena, Klajdi Vrioni (Kodra), Julian Malaj, Redion Meshi, Bledar Matoshi dhe Marildo Rona.