10 ditë para mbledhjes së Komitetit të Ministrave ku pritet të votohet “për ose kundër” anëtarësimit të Kosovës në Këshill të Evropës, Kryeministri i Kosovës, Albin Kurti, në takimin diplomatët e shteteve të Quintit, i tha “JO” kërkesës së Ndihmës Sekretarit amerikan të Shtetit, Jim O’Brien, Presidentit të Francës, Emmanuel Macron dhe Kancelarit Federal të Gjermanisë, Olaf Scholz, për hapa konkretë nga qeveria e Kosovës drejt themelimit të Asociacionit të Komunave me shumicë serbe si kusht për t’iu bashkuar organizatës për të drejtat e njeriut, demokracinë dhe sundimin e ligjit në Evropë.

Mesditën e së hënës, 6 maj 2024, Zyra e Kryeministrisë lëshoi një komunikatë në lidhje me takimin e kryeministrit Kurti, zëvendëskryeministri të parë, Besnik Bislimi dhe zëvendësministrit të Punëve të Jashtme dhe Diasporës, Kreshnik Ahmeti, me ambasadorët dhe përfaqësuesit diplomatikë të shteteve të QUINT-it dhe Shefin e Zyrës së Bashkimit Evropian në Kosovë, Tomas Szunyog.

Ajo që ambasadori amerikan në Kosovë, Jeffrey Hovenier, ambasadori francez, Olivier Guérot dhe ai gjerman, Jorn Rohde, do t'i kumtojnë O'Brien-it, Macron-it dhe Scholz-it, pritet të jetë një "shuplakë" për ta, pas thirrjeve pikërisht për të pritur një tjetër rezultat të kundërt me atë që doli nga takimi i përfaqësuesve të tyre me kreun e qeverisë së Kosovës.

“Përparim urgjent për Asociacionin e Komunave të banuara me shumicë serbe”; “në kontekstin e aplikimit të Kosovës për anëtarësim në Këshillin e Evropës, progresit të shpejtë dhe të pakthyeshëm në zbatimin nga autoritetet kosovare të Asociacionit të Komunave me shumicë serbe”; Olaf Scholz nënvizoi rëndësinë e hapave konkretë nga autoritetet e Kosovës për themelimin e Asociacionit të Komunave me shumicë serbe, edhe në lidhje me aplikimin e Kosovës për anëtarësim në Këshillin e Evropës”, ishin tri kërkesat që ndihmës Sekretari Amerikan i Shtetit, dhe liderët e Francës dhe Gjermanisë ia përcjellën Kurtit.

Në kontekst të këtyre zhvillimeve, Kurti citohet të jetë ankuar te përfaqësuesit e Quint-it për standarde të dyfishta ndaj Kosovës me argumentin se neni 7 i Marrëveshjes Bazike – i cili parasheh themelimin e Asociacionit të komunave me shumicë serbe – “nuk mund të nxirret nga pakoja e Marrëveshjes së Brukselit dhe Aneksit në Ohër dhe nuk duhet të vendoset si prioritet dhe në qendër”.

Argument tjetër për mos-ndërlidhjen e zbatimit të zotimeve për rrugën e normalizimit të marrëdhënieve me Serbinë me çështjen e anëtarësimit të Kosovës në KiE është, sipas Kurtit, se Këshilli i Evropës ka të bëjë me“respektimin e drejtave të njeriut, demokracisë dhe sundimit të ligjit, vlera këto që Republika e Kosovës i përqafon”, dhe se nuk e ka selinë Bruksel por në Strasbug.

"Kryeministri kujtoi se normalizimi i marrëdhënieve mes Kosovës dhe Serbisë zhvillohet në Bruksel dhe jo në Strasburg; se procesi i anëtarësimit në Këshill të Evropës është çështje e respektimi të drejtave të njeriut, demokracisë dhe sundimit të ligjit, vlera këto që Republika e Kosovës i përqafon", bëhet e ditur në komunikatë.

Në përfundim, Kurti citohet t'i ketë bërë thirrje shteteve aleate të Kosovës për mbështetje më 17 maj pa kushtin e progresit për themelimin e Asociacionit si pararendës i anëtarësimit të Kosovës në këtë organizatë.

“Ai i bëri thirrje shteteve aleate të Kosovës, shteteve të QUINT-it që të mbështesin anëtarësimin e Kosovës me 17 maj në përputhje me vlerësimet nga vetë institucionet e Këshillit të Evropës, dhe mbi bazën e arritjeve meritore në zhvillimin e demokracisë, të drejtave të njeriut, sundimit të ligjit dhe linjëzimit të saj me vlerat dhe qëndrimet perëndimore.” – thuhet në njoftimin e Zyrës së Kryeministrit.