D4vd përballet me gjyqin për vdekjen e 14-vjeçares, gjykata në Los Anxhelos pranon vazhdimin e çështjes

Këngëtari amerikan D4vd, emri i vërtetë i të cilit është David Burke, do të përballet me gjyqin për vdekjen e një vajze 14-vjeçare, pasi një gjykatë në Los Anxhelos vendosi se prokuroria ka paraqitur prova të mjaftueshme për vazhdimin e çështjes.

Artisti 21-vjeçar akuzohet për vrasjen e Celeste Rivas Hernandez, e cila dyshohet se kishte kërcënuar se do ta bënte publike marrëdhënien e tyre.

Sipas akuzës së prokurorisë, Burke e ka goditur për vdekje vajzën dhe më pas ka copëtuar trupin e saj në garazhin e tij, përpara se mbetjet t’i fshihte në një automjet që më pas u braktis.

Trupi i Celeste Rivas Hernandez, në gjendje të rëndë dekompozimi, u gjet më 8 shtator 2025 në një automjet të regjistruar në emër të Burke, në zonën Hollywood Hills të Los Anxhelosit. Këngëtari u arrestua më pas në muajin prill.

Burke u ka thënë autoriteteve se nuk e dinte që vajza ishte e mitur. Ai ka mohuar akuzat për vrasje dhe është deklaruar i pafajshëm edhe për disa akuza të tjera, përfshirë gjymtimin e mbetjeve njerëzore dhe abuzimin seksual ndaj një të miture.