Alarmi/ Zelensky: Rusia kërkon 30 mijë ushtarë nga Koreja e Veriut për luftën në Ukrainë

Presidenti ukrainas Volodymyr Zelensky ka ngritur alarmin për një përfshirje të mundshme më të madhe të Koresë së Veriut në luftën e Rusisë kundër Ukrainës, duke pretenduar se Moska ka kërkuar deri në 30 mijë ushtarë shtesë nga Pheniani.

Sipas Zelenskyt, përgatitjet për mbërritjen e trupave po zhvillohen në rajonin rus të Voronezhit, pranë kufirit me Ukrainën. Ai ka bërë gjithashtu të ditur se Koreja e Veriut mund të dërgojë në Rusi edhe lëshues të tjerë raketash balistike.

Presidenti ukrainas ka paralajmëruar se bashkëpunimi ushtarak mes Moskës dhe Phenianit përbën një shqetësim më të gjerë, pasi Rusia mund t’i japë Koresë së Veriut përvojë të drejtpërdrejtë luftarake dhe njohuri për zhvillimin e armëve.

Një tjetër pikë tensioni mbetet Deti Kaspik. Zelensky ka bërë të ditur se forcat ukrainase kanë goditur anije që, sipas tij, përdoreshin për transport të ngarkesave ushtarake mes Rusisë dhe Iranit.

Nga ana tjetër, Teherani ka raportuar se një anije tregtare u godit në këtë zonë, duke shkaktuar vdekjen e një marinari dhe plagosjen e një tjetri. Autoritetet iraniane e kanë cilësuar ngjarjen si një akt agresioni.

Ndërkohë, luftimet mes Rusisë dhe Ukrainës vazhdojnë në disa fronte. Ministria ruse e Mbrojtjes ka njoftuar se sistemet e saj të mbrojtjes ajrore kanë rrëzuar 133 dronë ukrainas gjatë natës mbi disa rajone të Rusisë, përfshirë Belgorodin, Brjanskun, Kurskun, Rostovin, Krimenë, zonën e Moskës dhe Detin e Zi.

Ukraina, nga ana tjetër, ka raportuar sulme ruse në qytetin Kryvyi Rih, ku një godinë tregtare është përfshirë nga zjarri. Deri tani nuk është bërë i ditur bilanci i viktimave.

Gjatë natës, Kievi u përball gjithashtu me një valë sulmesh me raketa balistike. Sipas raportimeve paraprake, disa raketa goditën zona të kryeqytetit ukrainas, duke shkaktuar dëme dhe zjarre, ndërsa banorët u strehuan në stacionet e metrosë.