Spiunët e dëbuar rusë po ia mbathin në Japoni

Dhjetëra spiunë rusë, të dëbuar nga kryeqytetet perëndimore pas fillimit të luftës në Ukrainë, janë zhvendosur në Japoni, sipas zyrtarëve të inteligjencës.

Ata u dëbuan nga vendet perëndimore për ta bërë më të vështirë për Kremlinin mbledhjen e informacionit sekret dhe sigurimin e pajisjeve të ndjeshme që mund të përdoren për prodhimin e armëve.

Megjithatë, shërbimet e dobëta të inteligjencës së Japonisë dhe industria e saj e teknologjisë së lartë për mbrojtjen janë bërë një hallkë e rëndësishme e makinerisë ushtarake ruse, thanë për The New York Times zyrtarë aktualë dhe ish-zyrtarë të pesë agjencive perëndimore të inteligjencës.

Sipas qeverisë ukrainase, 90 për qind e raketave dhe dronëve rusë përmbajnë komponentë japonezë, të cilët përdoren në sulmet e përditshme ndaj qyteteve dhe forcave ushtarake të Ukrainës.

Sipas zyrtarëve, fakti që Moska vazhdon të ketë qasje në teknologjitë e zhvilluara në Perëndim dhe të disponueshme në Japoni, pavarësisht ndalimit të eksporteve për përdorim ushtarak, i ka mundësuar Rusisë të vazhdojë luftën në shkallë të plotë për më shumë se katër vjet.

Gazeta raportoi se një njësi e inteligjencës ushtarake ruse, e njohur si Drejtoria e 20-të, ka vepruar nga Tokio.

Spiunët, të maskuar si biznesmenë ose diplomatë, janë përpjekur të sigurojnë marrëveshje tregtare ose të vjedhin teknologji për ta kontrabanduar më pas në Rusi dhe për ta përdorur në fushën e betejës.

Sipas zyrtarëve, drejtuesi i Drejtorisë së 20-të ka luajtur një rol kyç në furnizimin e makinerisë ushtarake ruse.

Raportohet se ai vepronte nën mbulesën e një punonjësi të Aeroflot, kompanisë kombëtare ajrore të Rusisë. Që nga koha e Bashkimit Sovjetik, inteligjenca ushtarake ruse i ka përdorur punonjësit e kësaj kompanie si mbulim për agjentët e saj.

Thuhet se zyrtarët ukrainas i kanë paraqitur Japonisë prova se teknologjia e saj po përdoret në armët ruse, duke përfshirë dokumente dhe dëshmi të mbledhura gjatë intervistave.

Megjithatë, Tokio dyshohet se ka reaguar me ngadalë.

"Parajsë për spiunët"

Zyrtarët japonezë kanë thënë se janë të vetëdijshëm për këtë kërcënim dhe po punojnë për të përmirësuar aftësitë e vendit në mbledhjen e informacionit. Qeveria shtoi se po bashkëpunon me aleatët perëndimorë për të ndaluar eksportin drejt Rusisë të mallrave që mund të përdoren për qëllime ushtarake.

Japonia prej kohësh është cilësuar si një "parajsë për spiunët". Ajo nuk ka kapacitete të plota të inteligjencës dhe konsiderohet e cenueshme ndaj spiunazhit të huaj.

Kjo lidhet pjesërisht me kufizimet e vendosura nga Aleatët pas Luftës së Dytë Botërore, të cilët shpërbënë strukturat japoneze të mbledhjes së informacionit. Japonia ende nuk ka një shërbim të jashtëm inteligjence dhe është mbështetur kryesisht te informacioni i siguruar nga Shtetet e Bashkuara.

Megjithatë, reformat janë në zhvillim. Japonia ka miratuar një ligj për krijimin e Këshillit Kombëtar të Inteligjencës, i cili do të shërbejë si qendra drejtuese, si edhe të Byrosë Kombëtare të Inteligjencës.

Më vonë gjatë vitit 2026, vendi do të miratojë edhe një ligj të ri kundër spiunazhit, me synimin për të forcuar masat kundër veprimtarive të inteligjencës së huaj.

Kjo do ta përmirësojë aftësinë e Japonisë për të shkëmbyer informacione jo vetëm me SHBA-në, por edhe me Britaninë dhe partnerë të tjerë.

Prania e inteligjencës ruse në Japoni pritet të ngrejë shqetësime edhe për projektin e përbashkët të Tokios me Britaninë dhe Italinë për zhvillimin e një avioni luftarak të fshehtë të gjeneratës së gjashtë.

Programi Global Combat Air Programme, me vlerë 4.6 miliardë paund, i shpallur më herët në korrik, konsiderohet një projekt me ndjeshmëri shumë të lartë. Avionët e rinj pritet të hyjnë në shërbim në vitin 2035.

Japonia është eksportuesi më i madh në botë i teknologjive me përdorim të dyfishtë, civil dhe ushtarak, që Rusia kërkon për luftën e saj. Kompanitë shpesh i shesin këto produkte përmes zinxhirëve të ndërlikuar të furnizimit, duke kaluar nëpër vende të treta, shpesh Vietnamin, i cili më pas i eksporton ato në Rusi.

VladyslavVlasiuk, komisioneri ukrainas për sanksionet, tha në qershor se, megjithëse komponentët japonezë gjenden në 90 për qind të raketave dhe dronëve rusë, shumica e tyre fillimisht janë shitur për përdorim civil.

Eksportet e mallrave civile, të cilat më pas mund të përshtaten për përdorim ushtarak, janë shumë më të vështira për t'u kontrolluar.

Gjatë gjithë luftës, në armët ruse janë gjetur qindra komponentë të prodhuar nga aleatët dhe partnerët e Ukrainës, përfshirë pjesë të prodhuara në SHBA, Britani, Zvicër, Japoni, Australi dhe Korenë e Jugut.

Ukraina prej kohësh ankohet për atë që e quan "boshllëku i sanksioneve", përmes të cilit teknologjitë e huaja vazhdojnë të përfundojnë në Rusi dhe më pas përdoren kundër vetë Ukrainës. /Telegraph – Syri.net