Hakmarrja e Iranit/ Alarm në Bahrein, sirenat bien për të dytën ditë. Tehrani pretendon sulm ndaj SHBA-së

Tensionet në Lindjen e Mesme po përshkallëzohen më tej, pasi Irani ka nisur një valë të re sulmesh me raketa dhe dronë ndaj bazave ushtarake amerikane në rajon, në përgjigje të sulmeve të fundit të SHBA-së mbi territorin iranian.

Garda Revolucionare Islamike (IRGC) deklaroi se ka goditur objektet ushtarake amerikane në Bahrein, duke pretenduar se sulmet kanë shënjestruar bazën ajrore Sheikh Isa. Sipas agjencisë gjysmëzyrtare iraniane Fars, objektivat përfshinin qendrën e mirëmbajtjes së helikopterëve, një hangar ku ndodhej një avion patrullues P-8 Poseidon dhe qendrën e komandimit të dronëve të forcave amerikane.

IRGC paralajmëroi se operacionet hakmarrëse do të vazhdojnë edhe në ditët në vijim.

Ndërkohë, Ministria e Brendshme e Bahreinit njoftoi se sirenat e alarmit janë aktivizuar në të gjithë vendin për të dytën ditë radhazi, ndërsa u bëri thirrje qytetarëve dhe banorëve të strehohen në vendet më të afërta të sigurta dhe të ruajnë qetësinë.

Deri më tani nuk ka raportime zyrtare për dëme apo viktima në Bahrein, ndërsa Komanda Qendrore Amerikane (CENTCOM) nuk ka reaguar ende ndaj pretendimeve të Iranit.

Sulmet vijnë vetëm pak orë pasi SHBA ndërmori një tjetër operacion të gjerë ushtarak kundër objektivave iraniane në jug dhe qendër të vendit, duke e çuar konfliktin mes dy vendeve në një fazë edhe më të rrezikshme.