Gjermania dhe Franca ndalojnë projektin e përbashkët për avionin luftarak FCAS

Franca dhe Gjermania nuk ishin në gjendje të vazhdonin projektin e tyre të avionëve luftarakë, pasi autoritetet gjermane vendosën se nuk ishte e mundur që kompanitë e përfshira të vazhdonin, tha të hënën Pallati Elysee.

Kancelari gjerman Friedrich Merz dhe presidenti francez Emmanuel Macron diskutuan projektin në Mal të Zi javën e kaluar, dhe arritën në përfundimin se nuk kishte asnjë mënyrë për të thyer bllokimin prej muajsh midis firmave të armëve të përfshira në plan, thanë zyrtarët.

“Autoritetet gjermane konsideruan se nuk ishte e mundur të ushtrohej presion i mëtejshëm mbi kompanitë në fjalë”, tha Pallati i Elizesë në një deklaratë, raporton Reuters.

“Autoritetet franceze do të vazhdojnë të inkurajojnë kompanitë dhe forcat tona të armatosura, që të eksplorojnë mënyra dhe mjete për të ndjekur projekte ambicioze evropiane që janë në përputhje me interesat tona të sigurisë kombëtare”, shtoi ajo.

Projekti FCAS (Sistemi i Ardhshëm i Luftimit Ajror) konsiderohej si një nga programet më ambicioze të mbrojtjes në Evropë. Gjermania, Franca dhe Spanja synonin të zhvillonin së bashku një sistem të gjeneratës së re të luftës ajrore të rrjetëzuar, i cili parashikohej të hynte në shërbim në vitet 2040.

Megjithatë, projekti shumë miliardësh ishte bllokuar prej vitesh për shkak të mosmarrëveshjeve mes vendeve pjesëmarrëse dhe industrisë së mbrojtjes. Vonesat janë përsëritur vazhdimisht për shkak se partnerët nuk kanë arritur dakordësi mbi përgjegjësitë, teknologjitë dhe ndarjen e kontratave.