Nxehtësi ekstreme në maj në të gjithë Evropën, por a i pengon kjo turistët të vizitojnë kryeqytetetet?

Vala e të nxehtit e goditi Evropën shumë më herët. Arsyeja për këtë është ndryshimi i klimës, kështu që ekspertët thonë se mund të presim që dukuri të tilla të ndodhin më shpesh tani sesa më parë. Megjithatë, temperaturat e larta nuk i pengojnë turistët të vizitojnë kryeqytetet evropiane.

Një ditë pasi shërbimi kombëtar i motit regjistroi ditën më të nxehtë të majit në historinë franceze, turistët po shijojnë kohën pranë Kullës Eiffel. Temperatura prej 36 gradësh në maj i habiti. Por jo të gjithë.

"Është në rregull, sepse jetojmë në Oman, kështu që moti është i ngjashëm. Në fakt, atje është edhe më nxehtë, kështu që ky mot na përshtatet", thotë Harpreet Kaur, një turist nga Omani.

"Epo, përpiqem të pi shumë ujë, të jem gjithmonë e hidratuar, përpiqem të shkoj në vende ku ka hije. Nuk e prisja këtë", thotë turistja nga Argjentina, Sofia Vanicki.Në Madrid, qytetarët presin pije freskuese. Familja Garcia, e cila ka një traditë dekadash në drejtimin e këtij kiosku, ofron pije freskuese të ndryshme, të tilla si birrë, limonatë me akull dhe horchata.

"Në Madrid, klima është shumë e thatë dhe vitet e fundit ka qenë shumë e nxehtë. Njerëzit freskohen me pijet tona. Janë natyrale, i bëjmë vetë të tre pijet. Janë plotësisht natyrale. Dhe njerëzit e vlerësojnë këtë. Nuk janë shumë të ëmbla, përpiqemi të mos i bëjmë shumë të ëmbla, sepse përndryshe do të ishin shumë të rënda", thotë pronari i kioskës Manuel Garcia.

Në Mbretërinë e Bashkuar, rekordi për ditën më të nxehtë të majit u thye për të dytën ditë radhazi, pasi në disa pjesë të Londrës temperaturat tejkaluan 35 gradët. Shërbimi meteorologjik thotë se është ende shumë herët për të thënë nëse vera do të jetë e ngrohtë.

"Ne kemi kërkime shkencore në Zyrën Meteorologjike të cilat tregojnë se një studim i kohëve të fundit zbuloi se një rekord prej 32.8 gradësh, rekordi i temperaturës së majit, tani është rreth tre herë më i mundshëm në klimën e sotme sesa do të ishte në një klimë natyrore të paprekur nga emetimet e gazrave serrë. Pra, ajo që dikur ishte një ngjarje një herë në 100 vjet, tani është një ngjarje afërsisht një herë në 33 vjet", thotë Stephen Dixon i Zyrës Meteorologjike Britanike.

Por 35 gradët e Evropës janë ende të ulëta krahasuar me 41 gradë Celsius, që është temperatura e regjistruar në Vietnam.