FOTO/ Njihuni me macen dhe qenin e shpëtuar me dron nga vija e frontit në Ukrainë

Në vijën e frontit në Ukrainë, ku lufta vazhdon prej vitesh, edhe kafshët janë bërë pjesë e përditshmërisë së ushtarëve. Mes rrënojave, në llogore apo pika kontrolli, macet dhe qentë shpesh u afrohen ushtarëve në kërkim të ngrohtësisë dhe ushqimit, duke u kthyer në burim morali për ta.

Një histori e pazakontë ka ndodhur së fundmi me një mace dhe një qen, të cilët u shpëtuan nga zona e rrezikshme e luftës me ndihmën e një droni. Ushtarët e Brigadës së 14-të të Mekanizuar ukrainase organizuan një operacion të veçantë për të evakuuar macen Barsik dhe qenin Zagybluk, pasi ishte tepër e rrezikshme që dikush të afrohej fizikisht për t’i marrë.

Sipas zyrtares për shtyp të brigadës, kafshët u vendosën në çanta të posaçme dhe u transportuan për rreth 10 kilometra me dron, një operacion që kërkoi aftësi të veçanta nga piloti për një ulje të sigurt.

Operacioni pati një fund të lumtur: macja Barsik u njoh nga pronari i saj, një ushtar i plagosur që është në rikuperim, ndërsa qeni Zagybluk po qëndron me trupat në një zonë më të sigurt, larg vijës së frontit.

Kujdesi për kafshët në Ukrainë është bërë një simbol humanizmi edhe në kohë lufte. Organizata për mbrojtjen e kafshëve kanë shpëtuar mijëra kafshë që nga fillimi i pushtimit rus, duke përfshirë jo vetëm mace dhe qen, por edhe kafshë të tjera si kuaj, lopë, madje edhe bletë.

Megjithatë, sfidat mbeten të mëdha, pasi numri i kafshëve të braktisura është i lartë dhe burimet janë të kufizuara. Pavarësisht kësaj, histori si ajo e Barsikut dhe Zagyblukut tregojnë se edhe në mes të luftës, aktet e vogla të kujdesit dhe dhembshurisë vazhdojnë të mbijetojnë./CNN-Syri.net