Synonte institucionin mbikëqyrës të mediave, Rusia ‘pengon’ sulmin ndaj zyrtarëve

Rusia ka bërë të ditur se ka penguar atë që e përshkroi si një sulm të planifikuar “terrorist” që kishte në shënjestër zyrtarë të lartë të mbikëqyrësit shtetëror të mediave dhe komunikimeve Roskomnadzor.

Autoritetet akuzuan “shërbimet e inteligjencës ukrainase” për planifikimin e shpërthimit të një pajisjeje eksplozive në një makinë më 18 prill, duke theksuar se qëllimi ishte të pengohej puna e Roskomnadzor-it në fushën e sigurisë së informacionit, përfshirë edhe çështjet që lidhen me platformën e mesazheve Telegram.

Shërbimi Federal i Sigurisë i Rusisë (FSB) tha se shtatë të dyshuar janë arrestuar, ndërsa udhëheqësi i dyshuar është vrarë pasi ka bërë rezistencë gjatë arrestimit.

“Udhëheqësi i grupit, një banor i Moskës i lindur në vitin 2004, ofroi rezistencë të armatosur gjatë arrestimit dhe u neutralizua”, tha agjencia.

Zyrtarët shtuan se është hapur një çështje penale për akuza që përfshijnë trafikim të paligjshëm armësh dhe eksplozivësh, ndërsa po shqyrtohen edhe akuza të tjera lidhur me përgatitjen e një sulmi terrorist.

Ukraina nuk ka komentuar ende mbi këto pretendime./ AA.