Të dhënat mjekësore të vjedhura nga 500,000 vullnetarë britanikë reklamohen për shitje në një faqe interneti kineze

Informacioni shëndetësor që i përket 500,000 njerëzve në Mbretërinë e Bashkuar është vjedhur dhe është ofruar për shitje në faqen kineze të internetit Alibaba, ka konfirmuar ministri i Teknologjisë i Mbretërisë së Bashkuar, Ian Murray.

Të dhënat mjekësore vijnë nga pjesëmarrësit e UK Biobank, grupi më gjithëpërmbajtës i të dhënave në botë për informacion biologjik, shëndetësor dhe të stilit të jetesës, të përpiluara nga vullnetarë dhe të përdorura nga shkencëtarë në të gjithë botën për kërkime.

Murray tha se të hënën, më 20 prill, organizata informoi qeverinë se kishte identifikuar të dhënat e saj që po reklamoheshin për shitje nga disa shitës në platformat e tregtisë elektronike të Alibaba-s në Kinë.

“Biobank na tha se ishin identifikuar tre lista që duket se shesin të dhëna pjesëmarrësish të UK Biobank. Të paktën një nga këto tre grupe të dhënash duket se përmban të dhëna nga të gjithë 500,000 vullnetarët e UK Biobank”, shtoi Murray.

Sipas Biobank, të dhënat e rrjedhura nuk përmbanin emrat, adresat, detajet e kontaktit ose numrat e telefonit të pjesëmarrësve.

“Qeveria ka folur sot me shitësin dhe ata nuk besojnë se ka pasur ndonjë blerje nga 3 listat përpara se ato të hiqeshin”, tha Murray.

Ai shtoi se qeveria e Mbretërisë së Bashkuar kishte qenë në kontakt me qeverinë kineze dhe shitësin për të siguruar që listat ishin hequr.

“Dua të falënderoj qeverinë kineze për shpejtësinë dhe seriozitetin me të cilin punuan me ne për të ndihmuar në heqjen e këtyre listave dhe punën e vazhdueshme për të hequr çdo listë të mëtejshme,”

Sir Rory Collins, drejtor ekzekutiv dhe hetues kryesor i UK Biobank, kërkoi falje në një letër drejtuar pjesëmarrësve për shqetësimin që ka shkaktuar ky incident dhe i siguroi ata se informacioni personal identifikues mbetet i sigurt.

“Në dritën e këtij incidenti, ne po ndërmarrim hapa të mëtejshëm për të përmirësuar sistemet tona për të parandaluar që kjo të ndodhë përsëri”, shtoi Collins.

Ai njoftoi se organizata ka pezulluar përkohësisht të gjithë aksesin në platformën kërkimore UK Biobank, ndërsa vendos një kufi të rreptë në madhësinë e skedarëve që mund të shkarkohen nga platforma.