Një diplomat i lartë sllovak ka qenë në kontakt të ngushtë me abuzuesin seksual Jeffrey Epstein. Bëhej fjalë si për gra, ashtu edhe për ndikim politik – përfshirë edhe mbi kryeministrin Robert Fico. Qeveria po bllokon hetimet.

Nga Viktoria Grossmann, SUEDDEUTSCHE ZEITUNG

Më 15 mars 2018, Robert Fico jep dorëheqjen nga posti i kryeministrit të Sllovakisë. Tre javë më parë, më 21 shkurt, gazetari i ri investigativ Jan Kuciak ishte qëlluar për vdekje në shtëpinë e tij, së bashku me të fejuarën e tij që ndodhej rastësisht aty. Pas kësaj shpërthyen protesta masive kundër qeverisë.

Miroslav Lajçak, atëherë ministër i Jashtëm, më 15 mars 2018 merr një mesazh nga Jeffrey Epstein:

“Po shoh që ke telashe në shtëpi”.

Lajçák përgjigjet: “Rrëmujë e madhe”.

Epstein: “Shans i madh”.

Lajçak dërgon një emoji duke qeshur.

Epstein vazhdon: “Mund të flasim për alternativa, nëse qeveria jote bie. Mos u shqetëso”.

Lajçák përgjigjet me një emoji që shkel syrin.

Epstein kishte organizuar një darkë me Steve Bannon

Një ditë më parë, Lajçák kishte humbur një “darkë me Bannon”, ku e kishte ftuar Epstein. Steve Bannon njihet si ideolog i së djathtës radikale amerikane dhe ish-strateg i presidentit Donald Trump.

Lajçak e anuloi pjesëmarrjen sepse duhej të udhëtonte herët të nesërmen për në Kolumbi dhe Brazil. Në atë kohë, ai ishte edhe president i Asamblesë së Përgjithshme të OKB në Nju Jork.

Në Sllovaki, shumë politikanë kanë arritur të mbijetojnë gjatë në detyrë pavarësisht skandaleve. Por publikimi i dosjeve hetimore për Epstein – i cili u gjet i vdekur në qelinë e tij në vitin 2019 – çoi këtë herë në një dorëheqje të shpejtë pikërisht aty.

Para një muaji, Lajçak dha dorëheqjen edhe si këshilltar i kryeministrit Fico, i cili është rikthyer në pushtet që nga viti 2023. Megjithatë, Lajçak e paraqiti veten si viktimë të “hienave”.

Opozita kërkon sqarime, ndërsa qeveria bllokon

Lajçak, sot 62 vjeç, konsiderohet një politikan dhe diplomat shumë i suksesshëm – por gjithashtu një nga bashkëpunëtorët më të afërt të Epstein: ky i fundit thuhet se e kishte ruajtur si kontakt emergjence në telefon.

Nga komunikimet e zbuluara rezulton se Epstein kishte interes të madh për Sllovakinë – si për ndikim politik, ashtu edhe për vajza të reja sllovake. Ai e kishte vizituar vendin dhe kishte planifikuar të blinte një shtëpi. Ekzistojnë foto të tij me Lajçak në ambasadën sllovake në Vjenë dhe në qytetin e vjetër të Bratislavës.

“Duam hetime të vërteta”, thotë deputetja e opozitës Beata Jurik.

Pyetja që shtrohet tani në Sllovaki është: a ka ndërmjetësuar Lajçak një takim mes Steve Bannon dhe Robert Fico?

Fico nuk ka dhënë përgjigje të qartë, ndërsa Lajçak nuk ka folur që pas dorëheqjes. Jurik kërkon që rasti të hetohet nga prokurori i përgjithshëm.

Nga dosjet rezulton gjithashtu se Lajçak është takuar vetë me Bannon. Ky i fundit kishte udhëtuar në Europë në vitin 2018, ku takoi politikanë euroskeptikë.

Në tetor 2018, Lajçak i shkruan Epstein: “Kujtoja Steve-it ftesën për në Sllovaki për të takuar Fico-n”.

Ndërkohë, Epstein shprehte dëshirën të takonte ministrin rus të Jashtëm, Sergej Lavrov, me të cilin Lajçak kishte një takim.

“E dua Lavrovin”, i përgjigjet ai. Lajçak kishte studiuar në Moskë gjatë periudhës sovjetike.

Sipas opozitës, pikërisht në këtë periudhë, partia e Fico-s, Smer-SD filloi të ndryshojë narrativën, duke u kthyer gjithnjë e më shumë në një forcë anti-BE.

Pas dorëheqjes së Fico-s në 2018, koalicioni mbeti në pushtet, por humbi zgjedhjet në vitin 2020. Gjatë pandemisë, Fico u shfaq si kundërshtar i vaksinave dhe pro Rusisë. Në vitin 2023 ai u rikthye në pushtet.

Por komunikimet e Lajçak me Epstein nuk kufizohen vetëm te politika. Ai lavdëronte edhe gratë e bukura në Ukrainë dhe Rusi dhe mund të ketë qenë i përfshirë, ose të paktën në dijeni, të dërgimit të vajzave dhe grave te Epstein.

Sllovakja Nadia Marcinko pilotonte avionin “Lolita Express”

Lajçak nuk ishte lidhja e vetme e Epstein me Sllovakinë. Në dosje përmendet shpesh edhe Nadia Marcinko, e lindur në Presov. Ajo filloi si modele që në moshë të re dhe u bë e njohur në revista lifestyle.

Më vonë u trajnua si pilote dhe drejtonte avionin e Epstein, i njohur si “Lolita Express”. Sipas dokumenteve, ajo kishte një marrëdhënie me të dhe ishte e përfshirë në sigurimin e vajzave dhe grave për të. Ajo konsiderohet figurë kyçe në zbardhjen e rrjetit ndërkombëtar që Epstein dhe partnerja e tij Ghislaine Maxwell përdornin për shfrytëzim seksual të të miturave dhe grave të reja.

“Nuk e dimë sa gra dhe vajza sllovake kanë qenë viktima”, thotë Jurik, e cila ka nisur edhe një peticion për hetime.

Ndërkohë, Fico deklaroi publikisht se “vajzat janë mërzitur që Epstein ishte në Sllovaki dhe nuk i vuri re”, duke shtuar se ndoshta do të kishin dashur vetë të udhëtonin me “Lolita Express”.

Lajçak nuk ka mbetur pa punë: ai është ende anëtar i bordit mbikëqyrës të kompanisë së naftës Slovnaft, pjesë e grupit hungarez MOL Group.

Gjithashtu, ish-përfaqësuesi i lartë për Bosnjë-Hercegovinën dhe i dërguari i BE-së për marrëdhëniet Serbi-Kosovë vazhdon të konsiderohet si ekspert në arenën ndërkombëtare – të paktën sipas deklaratave të tij në mediet sllovake.