Ministri i Jashtëm, Araghchi: Irani do t'i përgjigjet çdo sulmi ndaj objekteve të tij energjetike!

Ministri i Jashtëm Abbas Araghchi thotë se Irani do të sulmojë objektet e kompanive amerikane në Lindjen e Mesme, nëse shënjestrohet infrastruktura e tij energjetike.

“Nëse shënjestrohen objektet iraniane, forcat tona do të shënjestrojnë objektet e kompanive amerikane në rajon, ose kompanitë në të cilat Shtetet e Bashkuara kanë aksione”, tha Araghchi, siç raportohet nga agjencia e lajmeve YCJ.

Vendi do të “veprojë me kujdes, në mënyrë që zonat me popullsi të dendur të mos jenë në shënjestër” në sulmet hakmarrëse, shtoi ai.

Araghchi tha gjithashtu se ndërsa “ngushtica e Hormuzit është e hapur”, Irani nuk do të lejojë kalimin e “cisternave të naftës dhe anijeve të armiqve dhe aleatëve të tyre”.

Rreth 20 përqind e naftës botërore kalon nëpër rrugën ujore strategjike që lidh Gjirin me Oqeanin Indian.

Sakaq edhe kryetari i Parlamentit të Iranit, Mohammad Bagher Ghalibaf, thotë se lufta tregon se bazat ushtarake amerikane në Lindjen e Mesme, rrezikojnë vendet e rajonit.

Bazat amerikane “nuk mbrojnë askënd – ato janë një kërcënim”, tha Ghalibaf në një postim në X.

Ai akuzoi Uashingtonin se po i jep përparësi Izraelit mbi aleatët rajonalë, duke shkruar se SHBA-të “sakrifikojnë të gjithë për Izraelin dhe nuk interesohen për askënd tjetër përveç Izraelit”.

Në një seri të veçantë postimesh më parë, Ghalibaf pretendoi gjithashtu se Presidenti i SHBA-së Donald Trump ishte “mashtruar” nga kryeministri izraelit Benjamin Netanyahu për të filluar luftën kundër Iranit./ Al Jazeera.