Dyfishohen abortet ligjore në Poloni, pavarësisht një ndalimi të rreptë

Numri i aborteve të ligjshme u dyfishua në Poloni gjatë vitit 2024 dhe apelimet në Gjykatën Evropiane të të Drejtave të Njeriut për shkak të refuzimit për të kryer aborte bazuar në klauzolën e ndërgjegjes janë pezulluar, njoftoi Këshilli i Evropës.

Një vend kryesisht katolik, Polonia futi një ndalim pothuajse të plotë të abortit në vitin 2021 nën qeverinë e mëparshme nacionaliste, pasi ndërprerja e një shtatzënie për shkak të anomalive të fetusit u shpall jokushtetuese.

Koalicioni pro-evropian i kryeministrit Donald Tusk fitoi zgjedhjet e vitit 2023 pjesërisht me premtimin për të lehtësuar kufizimet mbi abortin, por deri më tani nuk ka arritur një marrëveshje për ligjin.

Edhe pse Presidenti polak Karol Nawrocki ka lënë të kuptohet se do të bllokojë çdo përpjekje për të liberalizuar të drejtën për abort, qeveria e Tusk ka ndërmarrë hapa për të forcuar zbatimin e ligjit ekzistues dhe ka lëshuar rekomandime për spitalet dhe prokurorët, në të cilat ata sqaruan se aborti i kryer për hir të shëndetit mendor të një gruaje është i ligjshëm dhe theksuan se të gjitha spitalet janë të detyruara ta ofrojnë këtë procedurë.Komiteti i Ministrave i SE-së, i cili mbikëqyr zbatimin e vendimeve të Gjykatës Evropiane të të Drejtave të Njeriut, njoftoi se veprimet e qeverisë polake "duket se sjellin rezultate në praktikë".

"Numri i aborteve të ligjshme po dyfishohet nga viti në vit dhe nuk ka pasur pothuajse asnjë ankesë për refuzimin e abortit bazuar në klauzolën e ndërgjegjes", njoftoi Komiteti i Ministrave të SE-së, por shprehu keqardhje për mungesën e progresit në lidhje me miratimin e një ligji që do të siguronte ndërprerjen e sigurt të shtatzënisë.

Të dhënat nga Ministria e Shëndetësisë tregojnë se në vitin 2024, në spitalet polake u kryen pothuajse 900 aborte të ligjshme, ndërsa një vit më parë kishte 425 .

Në gjysmën e parë të vitit 2025, pati 411 aborte të ligjshme dhe të dhënat për të gjithë vitin e kaluar nuk janë të disponueshme.

Përpara vitit 2021 dhe shtrëngimit të ligjeve për abortin, më shumë se një mijë ndërprerje shtatzënie kryheshin çdo vit dhe pothuajse të gjitha rastet lidheshin me anomali të fetusit.