Sulmi ndaj Iranit/ Meloni: Nuk e dënoj dhe nuk e mbështes, nuk kam elementët për të marrë një qëndrim

Kryeministrja e Italisë, Giorgia Meloni, deklaroi se nuk ka elementët e nevojshëm për të marrë një qëndrim të qartë mbi sulmin e Shteteve të Bashkuara kundër Iranit.

Në një interviste në emisionin televiziv Fuori dal coro, Meloni theksoi se pothuajse askush në Evropë nuk ka informacion të mjaftueshëm për të dhënë një gjykim kategorik mbi situatën.

“Objektivisht nuk kam elementët e nevojshëm, ashtu siç nuk i ka pothuajse askush në Evropë, për të marrë një pozicion të prerë,” tha ajo, duke shtuar se, përveç kryeministrit spanjoll, pothuajse asnjë lider evropian nuk e ka dënuar hapur iniciativën dhe askush nuk po merr pjesë drejtpërdrejt në konflikt.

Meloni theksoi se Italia nuk është dhe nuk ka ndërmend të bëhet pjesë e luftës. Ajo sqaroi se qeveria italiane po kufizohet vetëm në forcimin e pranisë në disa vende të Gjirit që janë sulmuar nga Irani me raketa dhe dronë, por vetëm për qëllime mbrojtëse.

Sipas saj, ky vendim lidhet edhe me nevojën për të mbrojtur dhjetëra mijëra qytetarë italianë që ndodhen në rajon, si dhe kontingjentet ushtarake italiane. Italia ka rreth 2000 ushtarë të dislokuar në atë zonë.

Ajo shtoi se këto vende janë gjithashtu partnere të rëndësishme për Italinë, veçanërisht për interesat energjetike, por nënvizoi se Italia nuk do të hyjë në luftë.

Megjithatë, kryeministrja paralajmëroi se Italia mund të përballet me pasoja të konfliktit, si në aspektin e sigurisë së brendshme ashtu edhe në atë ekonomik.

“Për momentin nuk ka alarme të veçanta për sigurinë, por për arsye parandaluese jemi maksimalisht të mobilizuar,” tha ajo gjatë një interviste në emisionin televiziv Fuori dal coro.

Duke folur për konfliktin dhe rritjen e çmimeve të energjisë, Meloni deklaroi se qeveria është e vendosur të luftojë çdo formë spekulimi.

“Jemi të vendosur të luftojmë spekulimin. Përfitoj nga rasti të përsëris se u këshilloj të gjithëve kujdes, sepse nuk e përjashtoj që, nëse do të kemi prova për sjellje spekulative, të rrisim edhe taksat për kompanitë përgjegjëse dhe t’i përdorim ato para për të ulur faturat, veçanërisht ato të energjisë,” tha ajo.

Meloni u shpreh gjithashtu se situata ndërkombëtare është bërë gjithnjë e më e paqëndrueshme dhe se rregullat e së drejtës ndërkombëtare janë dobësuar.

Ajo tha se është dakord me deklaratat e ministrit të Mbrojtjes, Guido Crosetto, duke theksuar se bota po përballet me një realitet ku rregullat ndërkombëtare nuk respektohen më si më parë.

“Unë nuk mendoj se këto rregulla janë shkelur vetëm me këtë episod, sepse ka shumë precedentë, por sigurisht që tabloja është shumë kaotike,” u shpreh kryeministrja.

Sipas saj, kriza është bërë strukturore, veçanërisht pas pushtimit të Ukrainës. Në teori, respektimin e së drejtës ndërkombëtare duhet ta garantojë United Nations, por ekziston një situatë paradoksale: një nga anëtarët e përhershëm të Këshillit të Sigurimit të OKB-së ka pushtuar një vend fqinj për të tentuar ta aneksojë.

Meloni theksoi se Italia do të vazhdojë të punojë për rikthimin e diplomacisë dhe për të shmangur përshkallëzimin e mëtejshëm të konfliktit./ Alba Kepi/