Ambasada ruse: Rusët mund të largohen nga Irani nëpërmjet Turkmenistanit

Ambasada ruse në Turkmenistan njoftoi sot se rusët që nuk mund të largohen nga Irani në asnjë mënyrë tjetër, mund ta bëjnë këtë përmes Turkmenistanit, një ish-republikë sovjetike në Azinë Qendrore që ka një kufi prej 1,148 kilometrash me pjesën verilindore të Iranit.

Në një deklaratë të publikuar në Telegram, ambasada tha se rusët që duan të kalojnë nëpër Turkmenistan mund të regjistrohen në ambasadën ruse në Teheran.

Shtetas të tjerë të huaj, përfshirë disa rusë, largohen nga Irani përmes kalimeve kufitare me Turqinë, Armeninë dhe Azerbajxhanin.

Autoritetet e Turkmenistanit, të cilat mbajnë neutralitet të rreptë në marrëdhëniet ndërkombëtare, e quajtën shpërthimin e armiqësive në Lindjen e Mesme për të ardhur keq dhe bënë thirrje për një zgjidhje diplomatike të konfliktit, raportoi agjencia britanike Reuters në faqen e saj të internetit.