Sulmi ndaj Iranit/ Lideri i Egjiptit paralajmëron për kaos në Lindjen e Mesme

Presidenti egjiptian Abdel-Fattah el-Sissi ka paralajmëruar se Lindja e Mesme mund të rrëshqasë në kaos, ndërsa konflikti që përfshin SHBA-në, Izraelin dhe Iranin ka hyrë në ditën e dytë.

Ai bëri thirrje për “dialog dhe mjete paqësore” për të zgjidhur krizat e rajonit, duke thënë se përshkallëzimi ka pasoja serioze që mund ta shtyjnë Lindjen e Mesme në kaos. Komentet e El-Sissi-t erdhën në një telefonatë të dielën me udhëheqësin e Omanit, Sulltan Haitham bin Tariq Al Said, sipas zyrës së udhëheqësit egjiptian.

Sakaq edhe ministri i Jashtëm egjiptian, Badr Abdelatty, bëri thirrje për “ulje të tensioneve dhe përparësi në diplomaci”, për të shmangur “kaosin gjithëpërfshirës” në rajon.

“Nuk ka alternativë tjetër përveç dialogut për të adresuar krizën aktuale”, tha ai.

Komenti i Abdelatty erdhi në një telefonatë me ministrin e jashtëm irakian Fuad Hussein, tha ministria e jashtme egjiptiane.

Ndërkohë  kryetari i parlamentit të Iranit i quajti të dielën udhëheqësit e Shteteve të Bashkuara dhe Izraelit "kriminelë të ndyrë", të cilët do të përballen me "goditje shkatërruese" për sulmet e tyre të vazhdueshme ndaj Republikës Islamike.

Mohammad Bagher Qalibaf e bëri komentin në një fjalim televiziv.

Qalibaf është zyrtari më i lartë që shfaqet para kamerave, që nga fillimi i sulmeve të shtunën.

«E keni kaluar vijën tonë të kuqe dhe duhet të paguani çmimin», tha ai. «Do t’ju ​​japim goditje aq shkatërruese saqë ju vetë do të detyroheni të lypni.»/ AP.