OKB bën thirrje për përmbajtje pas përleshjeve ndërkufitare Afganistan - Pakistan

Sekretari i Përgjithshëm i OKB-së, Antonio Guterres, shprehu shqetësim në lidhje me raportet për përleshje ndërkufitare midis Afganistanit dhe Pakistanit, tha zëdhënësi i tij të enjten.

Guterres "po ndjek me shqetësim raportet për përleshje ndërkufitare midis forcave de facto të sigurisë në Afganistan dhe forcave të sigurisë pakistaneze", tha Stephane Dujarric.

"Ai u bën thirrje palëve përkatëse të përmbushin detyrimet e tyre sipas ligjit ndërkombëtar, përfshirë ligjin ndërkombëtar humanitar, dhe të sigurojnë mbrojtjen e civilëve", shtoi Dujarric.

Duke përgëzuar përpjekjet e ndërmjetësimit nga disa shtete anëtare në muajt e fundit, Dujarric tha se Guterres gjithashtu i nxit palët të vazhdojnë të përpiqen të zgjidhin çdo mosmarrëveshje përmes diplomacisë, raporton agjencia shteërore e lajmeve turke, Anadolu.

Pakistani bombardoi objektivat e qeverisë talebane në qytetet kryesore të Afganistanit gjatë natës, thanë zyrtarë nga të dy vendet të premten, me ministrin e mbrojtjes të Pakistanit që e quajti konfliktin "luftë të hapur".

Burime sigurie në Pakistan thanë se sulmet përfshinin sulme me raketa ajër-tokë ndaj zyrave dhe posteve ushtarake të talebanëve në Kabul, Kandahar dhe Paktia, si dhe përleshje tokësore në sektorë të shumtë përgjatë kufirit midis kombeve islamike.

Talebanët thanë se nisën atë që e përshkruan, si sulme hakmarrëse ndaj bazave ushtarake pakistaneze.

Të dyja palët raportuan humbje të mëdha, duke dhënë shifra krejtësisht të ndryshme që Reuters nuk mundi t’i verifikonte në mënyrë të pavarur.

"Durimi jonë ka mbaruar. Tani është një luftë e hapur midis nesh dhe jush (Afganistanit)", tha të premten Ministri i Mbrojtjes i Pakistanit, Khawaja Muhammad Asif.

Marrëdhëniet midis Kabulit dhe Islamabadit janë tensionuar nga një mosmarrëveshje e gjatë mbi akuzën e Pakistanit se Afganistani strehon militantë, që kryejnë sulme përtej kufirit. Talebanët i kanë mohuar akuzat dhe kanë thënë se siguria e Pakistanit është një problem i brendshëm.

Sulmet ndaj instalimeve qeveritare talebane janë një përshkallëzim i madh dhe kërcënojnë një konflikt të zgjatur përgjatë kufirit prej 2,600 km (1,615 milje).

Zëdhënësi i talebanëve, Zabihullah Mujahid, konfirmoi se forcat pakistaneze kryen sulme ajrore në pjesë të Kabulit, Kandaharit dhe Paktias, por nuk dha detaje.

Kandahari është selia e talebanëve dhe qyteti ku ndodhet lideri suprem shpirtëror Haibatullah Akhundzada.

Videoja e ndarë nga zyrtarët e sigurisë pakistaneze tregoi shkëndija drite gjatë natës nga të shtënat përgjatë kufirit dhe zhurmën e artilerisë së rëndë. Një video e sulmeve në Kabul, për të cilën Reuters arriti të verifikonte vendndodhjen, tregoi re të dendura tymi të zi që ngriheshin nga dy vende dhe një flakë masive në një pjesë të kryeqytetit.

Një video tjetër tregonte një ndërtesë në flakë, për të cilën zyrtarët thanë se ishte një seli e talebanëve në provincën Paktia.

"Kundërsulmet pakistaneze kundër objektivave në Afganistan vazhdojnë", tha një zëdhënës i qeverisë pakistaneze, Mosharraf Zaidi, në një postim në X, duke e përshkruar veprimin si një përgjigje ndaj "sulmeve të paprovokuara afgane".

Dëshmitarë të Reuters në Kabul thanë se shumë sirena të ambulancave mund të dëgjoheshin pas shpërthimeve të forta dhe zhurmës së avionëve.

Zaidi tha se 133 luftëtarë talebanë afganë u vranë dhe më shumë se 200 u plagosën, me 27 postblloqe të shkatërruara dhe nëntë të pushtuara.

Mujahid, zëdhënësi i talebanëve, tha se 55 ushtarë pakistanezë u vranë dhe 19 postblloqe u sekuestruan, ndërsa tetë luftëtarë talebanë u vranë, 11 u plagosën dhe 13 civilë u plagosën në provincën Nangarhar.

SIGURI E LARTË

Aftësitë ushtarake të Pakistanit janë shumë më të larta se ato të Afganistanit. Megjithatë, talebanët janë të aftë në luftën guerile, të forcuar nga dekada luftimesh me forcat e udhëhequra nga SHBA-të, përpara se të riktheheshin në pushtet në vitin 2021.

Përleshjet midis Pakistanit dhe Afganistanit në tetor vranë dhjetëra ushtarë, derisa negociatat e lehtësuara nga Turqia, Katari dhe Arabia Saudite i dhanë fund armiqësive.

Ministrat e jashtëm të Pakistanit dhe Arabisë Saudite biseduan të premten për të diskutuar uljen e tensioneve, tha zyra e jashtme e Riadit pa dhënë detaje nëse Riadi ishte i përfshirë në ndërmjetësimin e një armëpushimi.

Rusia, i vetmi vend që e njeh zyrtarisht qeverinë e talebanëve, bëri thirrje për t'i dhënë fund armiqësive dhe tha se do të shqyrtonte ndërmjetësimin e bisedimeve nëse do të kërkohej nga të dyja palët, raportuan mediat shtetërore duke cituar ministrinë e jashtme të Moskës.

Pakistani ka qenë në gatishmëri të lartë sigurie që kur nisi sulmet ajrore në fillim të kësaj jave, të cilat Islamabadi tha se kishin në shënjestër kampet e Tehreek-e-Taliban (TTP), ose talebanëve pakistanezë, dhe militantëve të Shtetit Islamik në Afganistanin lindor.

Kabuli dhe Kombet e Bashkuara thanë se sulmet vranë 13 civilë dhe përsëritën se nuk u lejojnë militantëve të veprojnë nga territori i tyre. Talebanët paralajmëruan gjithashtu se do të kishte një përgjigje të fortë.

Qeveria e provincës Punjab të Pakistanit tha të premten se ishte në gatishmëri të lartë për sulme militante dhe kishte kryer një sërë operacionesh sigurie, duke dërguar 90 shtetas afganë në qendrat e mbajtjes për deportim.

Një media shtetërore nga Nangarhar i Afganistanit, Agjencia e Lajmeve Bakhtar, ndau një imazh të asaj që e quajti një batalion sulmuesish vetëvrasës dhe citoi një burim të sigurisë afgane të thoshte se bombarduesit ishin të pajisur me jelekë shpërthyes dhe makina-bomba dhe ishin të përgatitur për të goditur objektiva të mëdha.

Zyrtarët pakistanezë kanë thënë ditët e fundit se kanë frikë nga një përshkallëzim i sulmeve militante në qendrat urbane, shkruan Reuters.