Prezantuesja amerikane e lajmeve, Savannah Guthrie, ka njoftuar se familja e saj po ofron një shpërblim prej 1 milion dollarësh për çdo informacion që çon në kthimin e nënës së saj, në ditën e 24-të të kërkimit për 84-vjeçaren.

Duke mbajtur lotët, prezantuesja e NBC tha në një video në Instagram se po “ndjejnë dhembje” për Nancy Guthrie, e cila dyshohet se është rrëmbyer nga shtëpia e saj në Tucson, Arizona.

“Ne ende besojmë në një mrekulli, ende shpresojmë se ajo mund të kthehet në shtëpi – shpresë kundër shpresës,” tha prezantuesja.
“Ne gjithashtu e dimë se ajo mund të jetë e humbur, mund të jetë zhdukur tashmë, ose mund të jetë kthyer tashmë në shtëpi te Zoti që e do.”

Në videon e publikuar të martën në mëngjes, Savannah Guthrie tha gjithashtu se familja e saj do të dhuronte 500,000 dollarë për Qendrën Kombëtare për Fëmijët e Zhdukur dhe të Shfrytëzuar.

“Shpresojmë që vëmendja e kushtuar mamasë sonë dhe familjes sonë të përhapet edhe tek të gjitha familjet e tjera që kanë kaluar situata si e jona,” tha ajo.

Policia ka njoftuar se beson se Guthrie ishte viktimë e një rrëmbimi të qëllimshëm. Familja ka bërë disa thirrje publike për kthimin e saj të sigurt dhe ka kërkuar prova se ajo është gjallë. Por deri më tani, zhdukja mbetet një mister.

Autoritetet kanë publikuar imazhe të një burri, të marra nga kamera e ziles së derës së shtëpisë së Guthrie, të cilin ata e konsiderojnë të dyshuarin kryesor.
Sipas një burimi të zbatimit të ligjit për partnerin amerikan të BBC-së, CBS News, i njëjti person ka qenë te dera e shtëpisë së Nancy Guthrie në një rast tjetër para se ajo të zhdukej.

Detektivët kanë marrë rreth 40,000 informacione nga publiku.