Iu arrestua vëllai për lidhjet me Epstein/ Mbreti asnjë mbrojtje për të: Ligji të bëjë punën…

Daily Mail - MARTIN ROBINSON

Mbreti i Britanisë së Madhe ka deklaruar se policia ka “mbështetjen dhe bashkëpunimin e tij të plotë” pas arrestimit të Andrew Mountbatten-Windsor, nën dyshimin për shpërdorim detyre gjatë ushtrimit të funksionit publik.

Në një deklaratë të paprecedentë, Charles III tha se “ligji duhet të ndjekë rrjedhën e vet”, pasi shprehu “shqetësimin e tij më të thellë” për arrestimin e vëllait të tij.

Andrew u ndalua sot, në vitin e 66-të të lindjes së tij, dhe ndodhet në paraburgim policor pas një bastisjeje në banesën e tij të re në Sandringham.

Mbreti deklaroi në një njoftim të publikuar nga Pallati Buckingham se policia do të gëzojë “mbështetjen dhe bashkëpunimin e tij të plotë”.

“Mësova me shqetësimin më të thellë lajmin për Andrew Mountbatten-Windsor dhe dyshimin për shpërdorim detyre në funksion publik”, tha monarku.

“Ajo që pason tani është procesi i plotë, i drejtë dhe i rregullt, përmes të cilit kjo çështje do të hetohet në mënyrën e duhur dhe nga autoritetet përkatëse. Në këtë drejtim, siç kam thënë më parë, ata kanë mbështetjen dhe bashkëpunimin tonë të plotë.

“Dua të deklaroj qartë: ligji duhet të ndjekë rrjedhën e vet.

“Ndërsa ky proces vazhdon, nuk do të ishte e përshtatshme që unë të komentoja më tej mbi këtë çështje. Ndërkohë, familja ime dhe unë do të vazhdojmë detyrën dhe shërbimin tonë ndaj jush të gjithëve.”

Policia e Thames Valley arrestoi këtë mëngjes vëllanë më të vogël të Mbretit, i teti në radhën e trashëgimisë për fronin britanik, nën dyshimin për shpërdorim detyre në funksion publik.

Daily Mail ishte media e parë që zbuloi se policë me rroba civile, të transportuar me gjashtë automjete të pashënuara, kishin mbërritur në Wood Farm, ku Andrew jeton aktualisht, në orën 8 të mëngjesit.

Një autokolonë që përfshinte të paktën dy Land Rover mbretërore, të lidhura me Andrew, u fotografua duke u larguar nga prona më pak se një orë më vonë. Arrestimi i tij u konfirmua në orën 10:08 paradite.

Gjatë dhjetë ditëve të fundit, hetuesit kanë shqyrtuar veprimtarinë e tij si i dërguar tregtar i Mbretërisë së Bashkuar, pasi email-e në dosjet e Epstein sugjeronin se ai kishte ndarë informacione konfidenciale me mikun e tij pedofil, përfshirë raporte mbi vizitat e tij zyrtare dhe mundësi të mundshme investimi.

Një zëdhënës i Thames Valley tha sot: “Sot kemi arrestuar një burrë në të gjashtëdhjetat nga Norfolk, nën dyshimin për shpërdorim detyre në funksion publik”.

Policia njoftoi se oficerët e saj po kontrollojnë një adresë në Norfolk – që besohet të jetë Wood Farm, ku Andrew është tërhequr – dhe një adresë në Berkshire, me gjasë Royal Lodge në Ëindsor, ku ai jetoi për më shumë se 20 vjet deri këtë muaj.

“Personi ndodhet ende në paraburgim policor në këtë moment”, tha zëdhënësi – por policia nuk konfirmoi se ku ishte dërguar Andrew, i cili sot feston ditëlindjen.

Policia e Norfolkut deklaroi se po “mbështet” hetimin e Thames Valley, por nuk sqaroi nëse një nga stacionet e saj po përdorej nga hetuesit për të marrë në pyetje Andrew.

Ndihmës-shefi i Policisë së Thames Valley, Oliver Wright, tha: “Pas një vlerësimi të plotë, tani kemi hapur një hetim mbi këtë pretendim për shpërdorim detyre në funksion publik.

“Është e rëndësishme të mbrojmë integritetin dhe objektivitetin e hetimit tonë, ndërsa bashkëpunojmë me partnerët për të hetuar këtë vepër të pretenduar.

“Ne e kuptojmë interesin e madh publik për këtë çështje dhe do të japim përditësime në kohën e duhur.”

Andrew u arrestua në ditën kur mbushi 66 vjeç.