Gjermania synon ndalimin e rrjeteve sociale për fëmijët, Merz optimist

Kancelari gjerman Friedrich Merz ka shprehur “simpati” për një propozim për të ndaluar mediat sociale për fëmijët, përpara një diskutimi midis politikanëve në qeveri që fillon të premten.

Thirrjet për ndalimin e mediave sociale po shtohen në Gjermani, ndërsa vendet e tjera evropiane ecin përpara me masa të ngjashme, në një përpjekje për të mbrojtur shëndetin mendor dhe fizik të fëmijëve.

Merz i tha podkastit Machtwechsel të publikuar të mërkurën se ai ka “shumë simpati” për një propozim të Partisë Socialdemokrate për të ndaluar mediat sociale për fëmijët nën 14 vjeç — një propozim i paraqitur në një dokument diskutimi të raportuar nga POLITICO.

Merz tha në përgjithësi se është “shumë i kujdesshëm kur bëhet fjalë për ndalimet ligjore për diçka të tillë [mediat sociale]”, por se “pasojat” e lajmeve të rreme, imazheve të gjeneruara nga inteligjenca artificiale dhe platformave si TikTok, “i bëjnë gjërat më sfiduese”.

Mbrojtja e fëmijëve në shkollë “duhet të vijë e para”, tha kancelari, duke shtuar se ideja që fëmijët duhet të njihen me mjetet digjitale herët “nuk qëndron”, pasi përndryshe “do të duhej të shërbenit alkool edhe në shkollën fillore në mënyrë që ata të mësohen me të”.

Anëtarët e Unionit Kristian Demokrat të Merz, shprehën gjithashtu mbështetjen e tyre për një ndalim. Thorsten Frei, kreu i kancelarisë dhe një figurë e lartë e CDU-së, tha se çështja do të debatohet në një konferencë të partisë në Stuttgart, që do të zhvillohet të premten dhe të shtunën.

Të Gjelbrit dhe Aleanca Sahra Wagenknecht e krahut të majtë, kanë shprehur gjithashtu mbështetje për kufizimet e moshës. Alternativa për Gjermaninë e ekstremit të djathtë qëndron e vetme në kundërshtimin e një ndalimi, duke argumentuar se propozimi ka të bëjë me kontrollin dhe jo me mirëqenien e fëmijëve.

Një panel ekspertësh i emëruar nga qeveria, pritet të japë rekomandimet e tij për politikat para verës.

Franca dhe Danimarka kanë ecur përpara me ligje për të ndaluar fëmijët nën një moshë të caktuar të hyjnë në mediat sociale, ndërsa shumë vende të tjera të BE-së kanë propozime të ngjashme në diskutim. Kryeministri i Spanjës, Pedro Sánchez, njoftoi së fundmi një ndalim për personat nën 16 vjeç.

Disa vende, si Greqia, kanë kërkuar gjithashtu veprime në nivel BE-je dhe Presidentja e Komisionit Evropian, Ursula von der Leyen, ka mbledhur një panel ekspertësh për ta këshilluar atë.

Mbrojtësit e të drejtave të fëmijëve dhe privatësisë argumentojnë se ndalimet nuk do të jenë efektive në mbrojtjen e fëmijëve nga aspektet negative të botës online, por do t'i privojnë ata nga të drejtat e tyre për informacion dhe gjithashtu do të çojnë në kthim prapa në privatësinë për të gjithë popullsinë./ Politico.