Polonia duhet të 'nisë punën' për mbrojtje bërthamore

Presidenti i Polonisë, Karol Nawrocki, beson se vendi i tij duhet të fillojë zhvillimin e mbrojtjes bërthamore, për shkak të kërcënimit që vjen nga Moska.

Në një intervistë për televizionin Polsat të dielën, Nawrocki u shpreh se është "një mbështetës i madh i përfshirjes së Polonisë në projektin bërthamor" dhe argumentoi se vendi duhet të ndërtojë strategjinë e tij të sigurisë "mbi potencialin bërthamor".

Ai shtoi: "Kjo rrugë, me respekt për të gjitha rregulloret ndërkombëtare, është rruga që duhet të ndjekim. Duhet të punojmë drejt këtij qëllimi që të mund të nisim punën. Ne jemi një vend në kufi të drejtpërdrejtë me një konflikt të armatosur. Qëndrimi agresiv dhe imperial i Rusisë ndaj Polonisë është i njohur."

Komentet e tij vijnë në një kohë kur në disa vende europiane po zhvillohet një debat në rritje për zhvillimin e armëve të tyre bërthamore, për shkak të kërcënimeve në rritje nga Moska dhe rënies së besimit ndaj Shteteve të Bashkuara.

Kryeministrja e Letonisë, Evika Siliņa, për shembull, tha në Konferencën e Sigurisë në Mynih këtë fundjavë se "parandalimi bërthamor mund të na japë mundësi të reja". Ndërkohë, kancelari gjerman Friedrich Merz deklaroi se po zhvillohen bisedime me Francën për një mekanizëm europian të parandalimit bërthamor.

I pyetur se si mund të reagojë Moska ndaj një programi polak për armë bërthamore, Nawrocki u shpreh me shpërfillje: "Rusia mund të reagojë në mënyrë agresive ndaj gjithçkaje," tha ai. / Politico.eu – Syri.net