Juan Pablo Guanipa arrestohet sërish pas lirimit, opozita denoncon 'rrëmbimin' e tij nga autoritetet e Venezuelës

Juan Pablo Guanipa, një figurë kryesore në opozitën e Venezuelës dhe bashkëpunëtor i ngushtë i fitueses së Çmimit Nobel për Paqen Maria Corina Machado, u arrestua vetëm disa orë pasi u lirua nga burgu. Guanipa u arrestua me kërkesë të prokurorisë, e cila vendosi se ai kishte shkelur kushtet e përcaktuara për lirimin e tij.

Sipas prokurorisë, Guanipa foli publikisht për rastin e tij, duke shkelur detyrimet që i ishin imponuar. Zyra e prokurorit i kërkoi gjykatës që ish-nënkryetarin 61-vjeçar të parlamentit ta lironte nën arrest shtëpiak. Disa orë më parë, Guanipa, një ish-nënkryetar i Dhomës së Përfaqësuesve dhe figura më emblematike midis të burgosurve të opozitës, u lirua dy ditë para votimit parlamentar mbi ligjin historik të amnistisë në Venezuelë.

Sipas mediave të huaja, figura e opozitës ishte e lirë për më pak se 12 orë. Maria Corina Machado njoftoi mbrëmë se Guanipa u rrëmbye në Karakas nga burra të armatosur rëndë" që e morën me forcë në katër automjete. 

Pas lirimit të tij dje, të dielën pasdite, Guanipa hipi në një motoçikletë pranë burgjeve në Karakas, ku u takua me të afërmit e të burgosurve politikë dhe foli me gazetarët. Atje ai denoncoi rezultatin e zgjedhjeve presidenciale të vitit 2024 që lejuan socialistin Nicolas Maduro të rizgjidhej, duke i privuar opozitës nga fitorja për shkak të mashtrimit, sipas opozitës.