Një avion Airbus A320neo i kompanisë Scandinavian Airlines (SAS) ka tentuar të ngrihet nga aeroporti i Brukselit duke përdorur gabimisht një rrugë që përdorej nga taksitë dhe jo pistën e autorizuar të ngritjes.

Avioni e ndërpreu me urgjencë manovrën vetëm pak metra larg një depozite karburanti, pasi kishte arritur një shpejtësi rreth 220 km/orë.

Ngjarja ndodhi mbrëmjen e të enjtes, 5 shkurt, dhe është konfirmuar si nga autoriteti menaxhues i aeroportit belg, ashtu edhe nga vetë kompania ajrore skandinave. Pas largimit nga gate-i, në orën 22:03, A320neo mori shpejtësi për ngritje për fluturimin SK2590, me destinacion Kopenhagë.

Sipas të dhënave zyrtare, ekuipazhi kishte marrë autorizim për ngritje nga pista 07R (07 e djathtë), por për arsye ende të paqarta, avioni u fut në rrugën e taksive E1, e cila ndodhet paralelisht me pistën e duhur dhe është e pajisur me sinjalistikë të ndryshme.

Pasi ekuipazhi kuptoi gabimin, ngritja u ndërpre menjëherë dhe avioni u ndal në mënyrë të sigurt, pak metra larg depozitave të karburantit. Nuk ka të lënduar mes pasagjerëve apo anëtarëve të ekuipazhit.

Autoritetet kanë përjashtuar, në këtë fazë, një rol vendimtar të kushteve meteorologjike: buletini i motit i publikuar pak minuta para incidentit raportonte erëra të dobëta dhe dukshmëri mbi 10 kilometra.

Për episodin është hapur një hetim zyrtar, i cili do të shqyrtojë procedurat operative, komunikimin me kontrollin e trafikut ajror dhe faktorët njerëzorë që mund të kenë çuar në një gabim kaq serioz.