Festivali i lulëzimit të qershisë në Japoni, i cili ishte planifikuar të mbahej pranë malit Fuji, është anuluar për shkak të asaj që zyrtarët thonë se turistët janë gjithnjë e më të paedukatë.

Siç u tha, autoritetet lokale po anulojnë Festivalin e Lulëzimit të Qershisë në Parkun Arakuryama Sengen për shkak të turistëve që hyjnë pa leje në pronë private, hedhin mbeturina dhe bëjnë nevojat personale në oborre private.

Zyrtarët në qytetin japonez të Fujiyoshida kanë njoftuar se nuk do ta presin më Festivalin e Lulëzimit të Qershisë këtë vit, raporton Guardian.

“Pas peizazhit të bukur të malit Fuji fshihet realiteti se jeta paqësore e qytetarëve është e kërcënuar. Ekziston një ndjenjë krize. Për të mbrojtur dinjitetin dhe mjedisin jetësor të qytetarëve tanë, kemi vendosur të ulim perden e festivalit dhjetëvjeçar”, tha kryetari i bashkisë së Fujiyoshida, Shigeru Horiuchi.

Përveç “hapjes së dyerve të shtëpive private pa leje për të përdorur tualetin”, zyrtarët raportuan “hyrje të paautorizuar, hedhje mbeturinash” dhe turistë “që kryejnë nevojat personale në oborre private dhe krijojnë rrëmujë kur banorët e vënë re këtë”, tha kryebashkiaku.

Zyrtarët e qytetit thanë se qyteti pret më shumë se 10,000 vizitorë në ditë gjatë sezonit të lulëzimit, të ndihmuar nga kursi i favorshëm i këmbimit të monedhës vendase dhe popullariteti “shpërthyes” i gjeneruar nga mediat sociale.

Ky aktivitet, i cili zgjat disa javë, tërheq rreth 200,000 turistë çdo vit.