Presidenti i SHBA-së, Donald Trump, shprehu “mbështetjen e tij absolute” për kryeministren Sanae Takaichi përpara zgjedhjeve të së dielës, duke shtuar se mezi pret ta presë atë në Shtëpinë e Bardhë muajin e ardhshëm.

Kryeministrja e parë femër e Japonisë, një politikane konservatore që thotë se është frymëzuar nga “Zonja e Hekurt” e Britanisë, Margaret Thatcher, pritet të sigurojë një fitore të fortë, sipas sondazheve të opinionit. Ajo po kërkon një mandat për të zbatuar një plan shpenzimesh që ka shqetësuar investitorët dhe një nxitje të mbrojtjes që mund të përkeqësojë marrëdhëniet me Kinën .

Partia Liberale Demokratike e Takaichi-t dhe partnerja e saj, Partia e Inovacionit të Japonisë (Ishin), mund të fitojnë rreth 300 vende nga 465 në Dhomën e Ulët, sipas sondazheve, dukshëm më shumë se shumica e ngushtë që mbajnë aktualisht.

“Kryeministrja Takaichi meriton njohje të fortë për punën që po bën me Aleancën e saj”, shkroi Trump në platformën e tij, Truth Social, dje, të enjten.

“Është nder për mua t’i ofroj asaj dhe Aleancës së saj mbështetjen time të plotë dhe absolute”, shtoi ai.

Ndryshe nga paraardhësit e tij, Trump është përpjekur të ndikojë në zgjedhjet jashtë kufijve të SHBA-së. Analistët thonë se mbështetja e tij për politikanin 64-vjeçar nacionalist, Takaichi, është pjesë e lidhjes së tij me udhëheqësit e krahut të djathtë në mbarë botën.

Të enjten, ai shprehu mbështetjen e tij për kryeministrin hungarez Viktor Orban përpara zgjedhjeve të prillit. Ai gjithashtu mbështeti presidentin argjentinas Javier Milagrosa , duke nënvizuar se mbështetja financiare amerikane luajti një rol në suksesin e tij zgjedhor në vitin 2025.

Takaichi është drejt një fitoreje të qartë dhe mbështetja e Trump do të ketë ndikim në Japoni, sipas analistit gjeopolitik të Mizuho Bank, Asuka Tatebayashi.

“Komuniteti i biznesit do t’i vlerësojë marrëdhëniet e tyre me Trumpin, si dhe njohjen e presidentit amerikan”, tha Tatebayashi, duke shtuar: “Edhe në publikun e gjerë, Trumpi është popullor në Japoni, ndryshe nga ç’ndodh në disa vende perëndimore”.

Zëdhënësi i qeverisë Kei Sato nuk pranoi të komentojë mbi mbështetjen e Trump, por konfirmoi një ftesë për të vizituar Uashingtonin më 19 mars.

“Në një situatë ndërkombëtare që ndryshon me shpejtësi, vizita pritet të ofrojë një mundësi për të riafirmuar lidhjet e pathyeshme të aleancës Japoni-SHBA”, tha Sato në një konferencë për shtyp.

Takaichi, në një nga paraqitjet e saj të para si kryeministre në tetor, priti Trump në Tokio.