Trump nominon Kevin Warsh si kryetar të ri të Rezervës Federale

Presidenti Donald Trump ka nominuar zyrtarisht Kevin Warsh si kryetar të ri të Rezervës Federale. Warsh, i cili ka shërbyer më parë si guvernator i bankës qendrore nga viti 2006 deri në 2011, pritet të marrë detyrën në një periudhë të ndjeshme për ekonominë amerikane dhe tregjet financiare.

Në një postim në platformën Truth Social, Trump tha se Warsh është një nga kandidatët më të kualifikuar dhe do të mbahet mend si një nga kryetarët më të mirë të Rezervës Federale. 

Kandidatura do ti nënshtrohet dëgjimeve në Senat, më pas, Senati do të votojë për konfirmimin e kandidatit. Miratimi kërkon shumicën e thjeshtë të senatorëve.

Kevin Warsh, 55 vjeç, është një ekonomist me prirje të djathta, bashkëpunëtor në Institutin Hoover dhe anëtar i bordit të UPS. Ai njihet për qëndrimet e tij kritike ndaj politikave të mëparshme të Rezervës Federale, duke përqendruar vëmendjen te kontrolli i inflacionit dhe normat e interesit.

Nominimi i Warsh vjen pas vendimit të fundit të Rezervës Federale për të mbajtur normat e saj kryesore midis 3.5% dhe 3.75%. Trump ka kritikuar më parë kryetarin e mëparshëm, Jerome Powell, për mosveprimin e shpejtë në uljen e normave dhe ka shprehur besimin se Warsh do të ndjekë një politikë më fleksibile ndaj normave të interesit në afat të shkurtër.

Warsh ka gjithashtu lidhje të ngushta familjare me presidentin Trump, pasi vjehrri i tij, miliarderi Ronald Lauder, është një donator dhe aleat i njohur i tij.