Kryeministrja japoneze shpërndan dhomën e ulët të parlamentit, inflacioni në qendër të vëmendjes

Dhoma e ulët e parlamentit të Japonisë u shpërbë zyrtarisht sot me iniciativën e kryeministres Sanae Takaichi, e cila shpreson të përdorë popullaritetin e saj në zgjedhjet e parakohshme parlamentare më 8 shkurt, ndërsa lufton inflacionin.

Shpërbërja, e vendosur nga Sanae Takaichi, e cila u bë kryeministrja e parë femër e Japonisë në tetor, hap rrugën për zgjedhje të parakohshme parlamentare.Udhëheqësja ultranacionaliste po mbështetet në rezultatet e forta në sondazhe për të rritur vlerësimet e Partisë së saj të krahut të djathtë Liberal Demokratike, pasi koalicioni qeverisës ka vetëm një shumicë të ngushtë në parlament.

Zgjedhjet u përqendruan në ekonominë e vendit, e cila prej kohësh është prekur nga deflacioni, por që tani ka luftuar për tre vjet e gjysmë me rritjen e kostove të jetesës dhe një jen kronikisht të dobët që i bën mallrat e importuara më të shtrenjta.

Pak para shpërbërjes së parlamentit, të dhënat zyrtare treguan se inflacioni u ngadalësua në 2.4 përqind nga viti në vit në dhjetor dhe nën tre përqind në nëntor.

Ky ngadalësim i atribuohet kryesisht subvencioneve të energjisë të dhëna në dhjetor, ndërsa çmimet e ushqimeve vazhdojnë të rriten, me çmimet e orizit që u rritën me 34 përqind shtesë nga viti në vit.

Çmimi i orizit është më shumë se dyfishuar deri në mesin e vitit 2025.

Pakënaqësia publike me inflacionin kontribuoi shumë në rënien e Shigeru Ishiba, paraardhësit të Sanae Takaichi.

Duke kërkuar të qetësojë publikun, banka qendrore zbuloi një paketë stimulimi prej 117 miliardë eurosh në nëntor për të ofruar ndihmë për familjet dhe bizneset, duke përfshirë subvencione dhe grante.

Banka e Japonisë, e cila ka shtrënguar politikën monetare që nga fillimi i vitit 2024 për të frenuar inflacionin, e rriti normën e saj bazë të interesit në dhjetor në nivelin më të lartë në 30 vjet.