Turpi i madh i Europës në Iran

Nga Filipp Piatov, BILD

Në Evropë flitet me pasion për të drejtat universale të njeriut dhe të drejtën ndërkombëtare.

Por mënyra se si trajtohet Irani, tregon se sa e pabesueshme është bërë Evropa. Politikisht, ushtarakisht, por edhe shoqërisht.

Vetëm pak ditë më parë, udhëheqësit evropianë u indinjuan për arrestimin problematik nga pikëpamja e së drejtës ndërkombëtare të diktatorit venezuelas Maduro nga ushtria amerikane. Tani Evropa po qëndron duarkryq, ndërsa regjimi iranian po vret me mijëra qytetarë dashamirës të lirisë. Sjellja e Evropës mund të jetë formalisht në përputhje me të drejtën ndërkombëtare, por moralisht është e pambrojtshme.

Edhe në shoqëritë evropiane vërehet pak ndjeshmëri ndaj protestuesve iranianë. Aktivistët, që gjatë luftës në Gaza demonstronin çdo ditë kundër Izraelit, duket se për Iranin nuk kanë më shumë se një postim në Twitter – nëse edhe aq. Me sa duket vlen ky parim: Nëse Izraeli nuk mund të paraqitet si fajtor, viktimat nuk meritojnë solidaritet.

Prandaj nuk është për t’u habitur që pikërisht politikani ndoshta më i urryer në Evropë, shihet nga njerëzit në Iran si figura më e madhe e shpresës: presidenti amerikan Donald Trump.

Nëse Trump do ta dërgojë vërtet ushtrinë e tij në ndihmë të iranianëve, Evropa mund të rifillojë debatet për të drejtën ndërkombëtare. Por qytetarët iranianë, që po qëllohen në rrugë dhe po burgosen, do ta mbajnë mend se vlerat evropiane, në momentin vendimtar, nuk vlejnë shumë.