Familja e një protestuesi iranian të dënuar me vdekje, i bën thirrje Trumpit të ndërhyjë për të parandaluar ekzekutimin e tij

Erfan Soltani, një tregtar rrobash 26-vjeçar, u arrestua javën e kaluar nga Republika Islamike dhe ndodhet “në prag të ekzekutimit”, sipas një organizate për të drejtat e njeriut.

Presidenti i SHBA-së ka paralajmëruar se do të ndërmarrë “veprime shumë të forta” nëse protestuesit kundër qeverisë do të varen, duke u premtuar iranianëve se “ndihma është në rrugë”.

Një kushërirë e Soltanit, e cila u identifikua si Somayeh, deklaroi:
“Kërkesa jonë tani është që Trump të qëndrojë vërtet pas fjalëve që ka thënë, sepse populli iranian doli në rrugë duke u mbështetur në ato deklarata.”
Duke rrezikuar jetën e saj, ajo i tha CNN-it:
“Një popull i paarmatosur u besoi këtyre fjalëve dhe tani po qëllohet me armë. Ju lutem, mos lejoni që Erfoni të ekzekutohet.”

Sipas gazetës The Telegraph, anëtarë të familjes po udhëtonin drejt burgut Ghezel Hesar të martën vonë në mbrëmje, por që prej asaj kohe nuk ka pasur asnjë informacion të ri.

Somayeh i ka bërë thirrje Trumpit të “qëndrojë pas” kërcënimeve të tij për përdorimin e forcës ushtarake nëse Irani ekzekuton protestues. Më shumë se 2,570 persona janë vrarë në shtypjen gjithnjë e më të ashpër të protestave mbarëkombëtare nga regjimi iranian.

Soltani është rasti i parë i njohur ku është urdhëruar ekzekutimi gjatë protestave aktuale.

Trump paralajmëroi qartë se varja e protestuesve është një vijë e kuqe për SHBA-në:
“Do të marrim veprime shumë të forta. Kur fillojnë të vrasin mijëra njerëz dhe tani flitet për varje, kjo nuk do t’u dalë mirë.”

Të afërmit thonë se Soltani nuk ishte figurë udhëheqëse dhe nuk ishte pjesë e ndonjë grupi opozitar. Somayeh e përshkroi atë si një njeri që “thjesht donte që njerëzit të ishin të lirë, qoftë edhe në aspektet më bazë të jetës”.

Ajo mohoi se ai kishte përdorur ndonjëherë dhunë gjatë protestave.

Soltani u arrestua pranë shtëpisë së tij të enjten e kaluar dhe, sipas organizatës Hengaw me bazë në Norvegji, iu mohua e drejta për avokat dhe një gjykim të drejtë. Vetëm katër ditë më pas, familja u njoftua se ekzekutimi i tij ishte caktuar.

Aktivistët paralajmërojnë se ky është një model i përsëritur i regjimit iranian për të frikësuar protestuesit përmes dënimit me vdekje dhe se shumë ekzekutime të tjera priten.

Protestat, të cilat janë përhapur në rreth 180 qytete në të 31 provincat e Iranit, nisën për shkak të rritjes së kostos së jetesës dhe rënies së monedhës kombëtare, por shpejt u shndërruan në thirrje për ndryshim politik, duke përbërë një nga sfidat më serioze për regjimin iranian që nga viti 1979.