Gati projektligji i ri në Kongres: Groenlanda do të jetë shteti i 51-të i Amerikës

Nga Elizabeth Elkind, FOX NEWS

Një anëtar republikan i Dhomës së Përfaqësuesve kërkon që Groenlanda të bëhet shteti i 51-të i SHBA-së, ndërsa presidenti Donald Trump po e promovon publikisht idenë që territori danez të kalojë nën kontrollin amerikan.

Përfaqësuesi Randy Fine, republikan nga Florida, do paraqesë të hënën një projektligj që synon t’i japë autorizimin Presidentit Trump “të ndërmarrë çdo hap të nevojshëm” për të marrë Groenlandën dhe për ta vënë atë në rrugën drejt anëtarësimit në Shtetet e Bashkuara.

“Mendoj se është në interesin e botës që Shtetet e Bashkuara të ushtrojnë sovranitet mbi Groenlandën”, tha Fine për Fox News Digital në një intervistë.

“Kongresi do të duhet të vendosë nëse do ta bënte shtet, por ky ligj thjesht do ta autorizonte Presidentin të bëjë atë që po bën dhe do të tregonte se Kongresi qëndron pas tij. Kjo do ta përshpejtonte procesin drejt shtetësisë, por vendimi përfundimtar do të mbetej në dorë të Kongresit”.

Sekretari i Shtetit, Marco Rubio, tha të mërkurën se këtë javë do të takohej me zyrtarë danezë për të diskutuar çështjen e Groenlandës.

Trump e ka shpallur publikisht idenë që SHBA-të të blejnë territorin arktik që nga mandati i tij i parë në Shtëpinë e Bardhë.

Ai dhe zyrtarë të tjerë republikanë kanë theksuar rëndësinë strategjike të Groenlandës, përfshirë afërsinë e saj me Rusinë dhe mineralet kritike që gjenden në territorin e saj.

Fine u pajtua me këto argumente, duke shtuar se sipas tij sundimi amerikan do të ishte më i mirë edhe për banorët e Groenlandës.

“Shkalla e varfërisë atje është e lartë. Danimarka nuk i ka trajtuar mirë,” tha Fine. “Kur erdhi lufta, Danimarka nuk mundi t’i mbronte. Kush e mbrojti Groenlandën gjatë Luftës së Dytë Botërore? Ne”.

Megjithëse shumica e republikanëve pranojnë se e kuptojnë argumentin e Trump për përfitimet që SHBA do të kishin nga zotërimi i Groenlandës, disa ligjvënës republikanë u shqetësuan pasi zëdhënësja e Shtëpisë së Bardhë, Karoline Leavitt, nuk përjashtoi përdorimin e forcës ushtarake për ta marrë ishullin gjatë një konference për shtyp këtë muaj.

I pyetur nëse do të mbështeste përdorimin e forcës ushtarake, Fine tha: “Mendoj se mënyra më e mirë për ta marrë Groenlandën është vullnetarisht”.

“Shkalla e varfërisë në Groenlandë është shumë, shumë më e lartë se në Danimarkë. Vendi drejtohet nga socialistë dhe nuk është në interesin e Amerikës që një territor kaq i madh midis SHBA-së dhe Rusisë të drejtohet nga socialistë,” shtoi ai.

Kushtetuta e SHBA-së i jep Kongresit kompetencën për të pranuar shtete të reja në Union.

Zakonisht kërkohet që Kongresi të miratojë një ligj që autorizon shtetin e ri pasi territori të jetë formuar. Më pas, territori duhet të hartojë një kushtetutë shtetërore të miratuar nga banorët e tij.

Në fund, Kongresi duhet të votojë sërish për pranimin e shtetit të ri, përpara se vendimi të bëhet përfundimtar me nënshkrimin e presidentit.