Refuzon të kërkojë falje/ Mandelson për BBC: Nuk kam parë kurrë vajza të reja në pronat e Epstein

Lord Mandelson ka deklaruar për BBC-në se nuk ka parë asnjëherë vajza të reja në pronat e Jeffrey Epstein dhe ka refuzuar t’u kërkojë falje viktimave të pedofilit tashmë të ndjerë për ruajtjen e miqësisë me të, duke thënë se nuk ishte “në dijeni të asaj që ai bënte”.

Në intervistën e tij të parë që prej shkarkimit nga posti i ambasadorit të Mbretërisë së Bashkuar në SHBA, për shkak të lidhjeve me Epstein, Mandelson tha se beson se ishte “mbajtur i ndarë” nga ana seksuale e jetës së financierit, pjesërisht për shkak se ai është homoseksual.

Ai u largua nga detyra pasi dolën në dritë email-e që tregonin mesazhe mbështetëse që i kishte dërguar Epstein-it edhe pasi ky i fundit ishte dënuar në SHBA për nxitje prostitucioni me një të mitur.

Mandelson tha se të vetmit persona që kishte parë në pronat e Epstein-it ishin “shërbyese shtëpie të moshës së mesme”, duke theksuar se nuk kishte parë kurrë vajza apo gra të reja. Ai shtoi se do të kishte kërkuar falje vetëm nëse do të kishte qenë “në ndonjë mënyrë bashkëpunëtor ose fajtor”, gjë që sipas tij nuk ka ndodhur.

Jeffrey Epstein, financier me lidhje të gjera në qarqe politike dhe ekonomike, vdiq në vitin 2019 në një qeli burgu në Nju Jork, ndërsa priste gjyqin për akuza të trafikimit seksual. Më herët, në vitin 2008, ai ishte dënuar për nxitje prostitucioni me një të mitur dhe ishte regjistruar si abuzues seksual.

I pyetur në emisionin “Sunday with Laura Kuenssberg” në BBC nëse do t’u kërkonte falje viktimave për vazhdimin e miqësisë pas dënimit të parë të Epstein-it, Mandelson tha se ndiente keqardhje për dështimin e sistemit, por jo për veprimet e tij personale.

“Dua t’u kërkoj falje atyre grave për një sistem që refuzoi t’i dëgjonte dhe nuk u dha mbrojtjen që meritonin. Sistemi e mbrojti atë, jo ato,” u shpreh ai. “Nëse do ta dija, ose nëse do të isha në ndonjë mënyrë fajtor, patjetër që do të kërkoja falje. Por unë nuk isha në dijeni të asaj që ai bënte.”

Ai shtoi se do të pendohej gjithmonë për faktin që grave të pafuqishme, të cilave u ishte mohuar zëri, nuk iu ofrua mbrojtja e duhur.

Gjatë intervistës, Mandelson u pyet edhe për deklaratat e presidentit amerikan Donald Trump lidhur me idenë që SHBA-të të “zotërojnë” Groenlandën. Ai tha se e admironte drejtpërdrejtësinë e Trump-it, por nuk besonte se presidenti amerikan do të ndërmerrte një veprim të tillë me forcë.

“Nuk mendoj se ai do të zbarkojë në Groenlandë për ta marrë atë. Nga sa e njoh, ai nuk është budalla,” tha Mandelson, duke shtuar se Trump rrethohet nga këshilltarë që e kuptojnë se një veprim i tillë do të ishte kundër interesave të SHBA-së.

Ai theksoi gjithashtu rëndësinë strategjike të Arktikut, duke paralajmëruar për nevojën e sigurisë përballë Kinës dhe Rusisë, dhe duke shtuar se SHBA-të do të luajnë rolin udhëheqës në këtë drejtim.

Duke folur për miqësinë e tij shumëvjeçare me Epstein, Mandelson tha se kishte qëndruar disa herë në ishullin privat të financierit, si dhe kishte vizituar pronat e tij në Nju Jork dhe Nju Meksiko, por këmbënguli se gjatë këtyre vizitave nuk kishte vërejtur asgjë të dyshimtë.

Qeveria britanike e shkarkoi Mandelson pasi u bë e qartë se marrëdhënia e tij me Epstein ishte më e thellë sesa ishte deklaruar fillimisht. Burime nga Downing Street thanë se email-et e zbuluara përbënin informacion të ri dhe materialisht të ndryshëm nga ai që ishte ditur në momentin e emërimit.

Sekretarja e Transportit në hije e Partisë Laburiste, Heidi Alexander, e cilësoi qëndrimin e Mandelson si “naivitet të thellë”, duke shtuar se një kërkim faljeje do të kishte pasur rëndësi të madhe për viktimat.

Lord Mandelson, një nga arkitektët kryesorë të “Laburistëve të Rinjtë”, ka qenë një figurë qendrore e politikës britanike për më shumë se katër dekada, duke mbajtur disa poste ministrore gjatë qeverisjes së Tony Blair, përpara se Partia Laburiste të humbiste pushtetin në vitin 2010.