Sulmi rus me raketë balistike në Lviv, Letonia kërkon takim urgjent të OKB-së

Letonia do të kërkojë një takim urgjent të Këshillit të Sigurimit të Kombeve të Bashkuara, në përgjigje të sulmeve të fundit të rënda të Rusisë ndaj Ukrainës, tha të premten ministrja e Jashtme letoneze Baiba Braže.

Rusia më parë kreu sulme të reja ajrore në shkallë të gjerë në Ukrainë dhe tha se, për herë të dytë që nga fillimi i luftës, kishte përdorur raketën e saj me rreze të mesme veprimi Oreshnik, e cila është e aftë të mbajë bombë bërthamore, për të goditur qytetin perëndimor të Lvivit, jo shumë larg kufirit me Poloninë.

“Letonia do të kërkojë një takim të jashtëzakonshëm të Këshillit të Sigurimit të OKB-së në përgjigje të sulmit barbar të Rusisë kundër Ukrainës, përfshirë përdorimin e një rakete balistike me rreze të mesme veprimi pranë kufirit të BE-së dhe NATO-s”, shkroi Braže në X.

Letonia mori një vend jo të përhershëm në Këshillin e Sigurimit për herë të parë më 1 janar dhe do të shërbejë në organin më të fuqishëm të OKB-së për dy vjet.

Anëtari baltik i BE-së dhe NATO-s, i cili kufizohet me Rusinë, është një partner i ngushtë dhe mbështetës i Ukrainës, e cila ka luftuar një pushtim rus për gati katër vjet./ DPA News