Zhvillimi i bujshëm/ Sekuestrimi i cisternës me flamur rus, Trump i dërgon mesazh të fortë Putinit

SHBA sekuestruan një anije cisternë me flamur rus dhe një tjetër cisternë që po i drejtohej Kinës. Të dyja ishin të ngarkuara me naftë nga Venezuela. Zyrtarët amerikanë thanë se presidenti Donald Trump po dërgon një mesazh të fortë ndaj Kremlinit dhe Pekinit

BILD

Shtetet e Bashkuara kanë marrë nën kontroll cisternën ruse “Marinera” gjatë një operacioni ushtarak nga një anije e Rojës Bregdetare në Atlantikun e Veriut. Ajo i përket famëkeqes “flotë hije” të Putinit. Siç raporton “NBC”, duke iu referuar autoriteteve amerikane, cisterna është “siguruar” dhe tani po drejtohet drejt Skocisë. Ndërhyrja u krye për shkak të “shkeljeve të sanksioneve amerikane”, bëri të ditur Komanda Evropiane e Forcave të Armatosura të SHBA-së (EUCOM).

Paralelisht, edhe cisterna “Sophia” u sekuestrua nga Marina Amerikane në ujërat ndërkombëtare të Karaibeve. Këtë e konfirmoi e ashtuquajtura “Komanda Jugore” e Marinës së SHBA-së në rrjetin social X. Super-cisterna, e cila ndodhej nën sanksione amerikane, ishte e ngarkuar me 1.8 milionë fuçi naftë bruto venezueliane dhe, sipas vëzhguesve, ishte rrugës drejt Kinës.

Lidhur me cisternën e sekuestruar “Sophia”, Marina Amerikane deklaroi: “Anija e ndaluar, M/T Sophia, operonte në ujëra ndërkombëtare dhe kryente aktivitete të paligjshme në Karaibe. Roja Bregdetare e SHBA-së po e shoqëron M/T Sophia drejt Shteteve të Bashkuara, ku do të vendoset përfundimisht për hapat e mëtejshëm”.

Rusët flasin për “pirateri”

Kryetari i Komisionit për Ndërtimin e Shtetit në Federatën Ruse, Andrei Klishas, deklaroi në Telegram se pala amerikane ka shkelur të drejtën ndërkombëtare. Sipas tij, “SHBA-të kanë kryer pirateri të hapur në det të hapur, sipas ‘rregullave’ famëkeqe dhe në shkelje të së drejtës ndërkombëtare”.

Ndërkohë, Ministria e Jashtme ruse konfirmoi se në bord të cisternës “Marinera” ndodheshin edhe shtetas rusë. “Duke marrë parasysh informacionet që disponojmë për praninë e qytetarëve rusë mes anëtarëve të ekuipazhit, kërkojmë nga pala amerikane të garantojë trajtim human dhe dinjitoz, të respektojë rreptësisht të drejtat dhe interesat e tyre dhe të mos pengojë kthimin e shpejtë të tyre në atdhe”, deklaroi diplomacia ruse.

Nga ana tjetër, Shtëpia e Bardhë njoftoi se po shqyrton mundësinë e transferimit të ekuipazhit të cisternës në Shtetet e Bashkuara, për t’i gjykuar atje për shkelje të mundshme të ligjeve federale.

Cisterna “Marinera”, anija e parë e sekuestruar, kishte më shumë se dy javë që përpiqej t’i shpëtonte një bllokade amerikane ndaj cisternave të naftës nën sanksione. Ekuipazhi kishte përdorur metoda drastike për t’iu shmangur ndalimit. Anija fillimisht dështoi të ankorohej në Venezuelë për të ngarkuar naftë. Sipas autoriteteve amerikane, ajo ishte bosh, por ndiqej vazhdimisht nga Roja Bregdetare e SHBA-së.

Uashingtoni synon të dërgojë një sinjal të fortë kundër kontrabandës globale të naftës ilegale, përfshirë edhe naftën ruse të tregut të zi.

Rusët ia ndryshuan emrin anijes

Që në dhjetor, forcat amerikane kishin tentuar ta merrnin cisternën nën kontroll, por ekuipazhi kishte rezistuar dhe ishte drejtuar drejt Atlantikut të hapur. Sipas kompanisë analitike ‘Windward’, gjatë arratisjes nga Roja Bregdetare, marinarët pikturuan me nxitim një flamur rus në trupin e anijes. Ata ia ndryshuan emrin cisternës nga “Bella 1” në “Marinera” dhe, në mes të detit, e regjistruan anijen në Rusi.

Sipas zyrtarëve amerikanë, Rusia e regjistroi cisternën pa inspektim ose verifikim formal – një veprim i pazakontë. Ekspertët e shohin këtë si një përpjekje të qëllimshme për ta mbrojtur anijen nga ndërhyrje të mëtejshme amerikane.

Shtetet e Bashkuara kanë sekuestruar tashmë edhe dy cisterna të tjera të flotës hije: “Skipper” dhe “Centuries”. Pas agresionit rus ndaj Ukrainës dhe vendosjes së sanksioneve perëndimore, kjo flotë është rritur, sipas analistëve, në më shumë se 1000 cisterna. Shumë prej tyre janë mbi 15 vjet të vjetra, të siguruara dobët dhe fshehin itineraret duke fikur sinjalet e komunikimit.