Trump 'ngrin' për një vit rritjen e tarifave për disa mobilje të importuara

Presidenti i Shteteve të Bashkuara, Donald Trump, ka deklaruar se do të shtyjë për një vit zbatimin e tarifave doganore mbi mobiliet me tapiceri, dollapët e kuzhinës dhe lavamanët (vanities), mes shqetësimeve në rritje për koston e jetesës.

Trump nënshkroi një urdhër të mërkurën në mbrëmje, gjatë pushimeve të Vitit të Ri, duke pezulluar një tarifë të planifikuar prej 50% për dollapët e kuzhinës dhe lavamanët, si dhe një tarifë prej 30% për mobiliet me tapiceri.

Megjithatë, urdhri ruajti në fuqi tarifën prej 25% që ai kishte vendosur për këto produkte që në shtator.

Presidenti amerikan i kishte përshkruar më herët tarifat mbi mobiliet si një hap për të “forcuar industrinë amerikane dhe për të mbrojtur sigurinë kombëtare”.

Sondazhet tregojnë se rritja e çmimeve dhe kostoja e jetesës janë shqetësime kryesore për qytetarët në SHBA, ndërsa vendi i afrohet zgjedhjeve afatmesme të vitit 2026, të planifikuara për në nëntor.

Votuesit i konsiderojnë politikat e presidentit Trump, dhe veçanërisht tarifat, të paktën pjesërisht përgjegjëse për vështirësitë e tyre ekonomike. Një sondazh i Politico, i publikuar në dhjetor, zbuloi se 30% e të anketuarve i përmendën tarifat si arsyen kryesore të çmimeve të larta, ndërsa 32% thanë se Trump mban “përgjegjësi të plotë” për gjendjen e ekonomisë.

Shumica e të anketuarve përmendën koston e jetesës si çështjen kryesore me të cilën përballet vendi, ndërsa 32% përmendën gjendjen e ekonomisë. Politikanët demokratë janë përpjekur ta godasin Trumpin dhe Partinë Republikane për shqetësimet mbi përballueshmërinë e çmimeve, të cilat Trump i ka hedhur poshtë duke i quajtur një “mashtrim” të sajuar nga rivalët e tij politikë.

Ministria e Jashtme italiane bëri të ditur të enjten se SHBA kishte rënë gjithashtu dakord të ulë ndjeshëm tarifat e propozuara të importit për produktet e makaronave nga 13 kompani. /Al Jazeera/