Shpërthimi i vullkanit Etna nuk ndalon turistët të bëjnë ski

Vullkani Etna ka shpërthyer në Sicili, duke hedhur në atmosferë sasi të mëdha hiri dhe tymi, por kjo nuk i ka ndaluar turistët të bëjnë ski dhe të shohin nga afër këtë dukuri natyrore, të cilën e cilësojnë “mbresëlënëse”.

“Unë jam nga Hong Kongu dhe pamja nga Etna është mahnitëse. Është një vullkan aktiv në këtë mot të mrekullueshëm. Është shumë bukur”, u shpreh një turist.

Departamenti i Mbrojtjes Civile e rriti nivelin e alarmit për malin Etna nga jeshile në të verdhë, për shkak të përshkallëzimit të mundshëm të aktivitetit.

Megjithatë, turistët nuk do ta humbisnin mundësinë për të parë nga afër retë e hirit vullkanik ose për të shijuar një ditë alpinizmi me ski në mot të këndshëm.

“Le të themi se është një aktivitet shumë i veçantë për t’u bërë këtu në Etna. Është shumë mbresëlënëse të ngjitesh në këtë kohë, me kontrastin midis shpërthimit, borës dhe diellit. Është një përvojë unike”, tha një turist.

Etna konsiderohet vullkani më i madh dhe më i lartë në Evropë dhe një ndër më aktivët në botë. Etna monitorohet 24 orë në ditë për shkak të aktivitetit të tij të shpeshtë, pasi shpërthimet regjistrohen disa herë gjatë vitit.