Administrata e Trump rishikon sistemin e vizave H - 1B, përparësi punëtorët e kualifikuar dhe ata me pagë të lartë

Administrata Trump ka njoftuar një reformë të madhe të programit të vizave H-1B, e cila do të zëvendësojë shortin e deritanishëm, të përdorur prej vitesh për dhënien e vizave për punëtorë të huaj me kualifikime të specializuara, me një sistem të ri që favorizon punonjësit më të kualifikuar dhe më të paguar.

Rregulli i ri, që pritet të hyjë në fuqi më 26 shkurt 2026, do të rregullojë dhënien e dhjetëra mijëra vizave H-1B çdo vit, duke nisur nga sezoni i regjistrimit për vitin fiskal 2027.

Çdo vit janë të disponueshme deri në 85 mijë viza H-1B, të cilat u lejojnë profesionistëve të lindur jashtë SHBA-së të punojnë në fusha shumë të specializuara, përfshirë 20 mijë viza për persona me diploma të avancuara. Zakonisht, kërkesa e tejkalon këtë kufi vjetor.

Aktualisht, kompanitë amerikane konkurrojnë për këto viza të kufizuara përmes një shorti krejtësisht rastësor. Por sipas rregullit të ri, aplikantët në nivelin më të lartë të pagës do të marrin katër hyrje në përzgjedhje, ata në nivelin pasardhës tre hyrje, dhe kështu me radhë.

Kjo do të thotë se një aplikant me pagë më të lartë ose kualifikime më të avancuara do të ketë më shumë gjasa të fitojë vizën sesa dikush me pagë më të ulët ose aftësi më pak të specializuara. Punonjësit me paga ose aftësi më të ulëta nuk do të përjashtohen plotësisht, por shanset e tyre për t’u përzgjedhur do të jenë më të vogla.

Ndryshimi synon, sipas Shërbimit të Shtetësisë dhe Emigracionit të SHBA-së (USCIS), “të mbrojë më mirë pagat, kushtet e punës dhe mundësitë e punësimit për punëtorët amerikanë”, thuhet në një deklaratë për shtyp të publikuar të martën.

Ndërsa mbështetësit e programit H-1B argumentojnë se ai tërheq talente globale dhe nxit inovacionin, kritikët pretendojnë se sistemi u ka lejuar punëdhënësve të punësojnë punëtorë të huaj me paga më të ulëta sesa ato që do t’u paguanin amerikanëve.

“Procesi aktual i përzgjedhjes rastësore të regjistrimeve H-1B është shfrytëzuar dhe abuzuar nga punëdhënës amerikanë që synonin kryesisht të importonin punëtorë të huaj me paga më të ulëta se ato që do t’u paguanin punëtorëve amerikanë,” deklaroi Mattheë Tragesser, zëdhënës i USCIS. Ai shtoi se “me këto ndryshime rregullatore dhe të tjera në të ardhmen, do të vazhdojmë të përditësojmë programin H-1B për të ndihmuar bizneset amerikane, pa lejuar abuzimet që dëmtonin punëtorët amerikanë”.

Por Dobrina M. Ustun, avokate e emigracionit, i tha Neësëeek se rregulli i ri “rrezikon të përjashtojë pa dashje pikërisht punëdhënësit që Kongresi kishte për qëllim të ndihmonte me programin H-1B”.

“Dhënia përparësi niveleve të pagës si tregues i aftësisë shpërfill mënyrën se si funksionojnë realisht inovacioni, kërkimi mjekësor dhe kompanitë në fazë të hershme,” tha ajo, “dhe do të dëmtojë në mënyrë disproporcionale institucionet që nxisin rritjen ekonomike afatgjatë dhe përfitimin publik, në vend të fitimeve afatshkurtra”.

Rregulli do të publikohet në Regjistrin Federal më 29 dhjetor dhe do të hyjë në fuqi 60 ditë më vonë, në kohë për regjistrimin H-1B të vitit fiskal 2027. Kërkesat e dorëzuara më herët do të ndjekin sistemin e vjetër të shortit. Rregulli u finalizua me një shpejtësi të pazakontë, pasi Departamenti i Sigurisë Kombëtare publikoi tekstin vetëm disa ditë pasi dorëzoi një version draft në Zyrën e Informacionit dhe Çështjeve Rregullatore të Shtëpisë së Bardhë.

Ky hap shënon lëvizjen më të fundit të Administratës Trump për të riformësuar rrënjësisht politikën amerikane të emigracionit.

Më herët këtë vit, Trump nënshkroi gjithashtu një vendim që parashikon një tarifë prej 100 mijë dollarësh për aplikimet H-1B. Kjo masë është përballur me disa sfida ligjore;

një gjyqtar hodhi poshtë një padi të ngritur nga Dhoma Amerikane e Tregtisë dhe Shoqata e Universiteteve Amerikane, të cilat pretendonin se tarifa ishte e paligjshme, megjithëse grupet mund ta apelojnë vendimin. Edhe një grup shtetesh të drejtuara nga demokratët ngritën padi për këtë tarifë më herët këtë muaj.

“Si pjesë e angazhimit të Administratës Trump për reformën e H-1B-së, ne do të vazhdojmë të kërkojmë më shumë si nga punëdhënësit ashtu edhe nga shtetasit e huaj, në mënyrë që të mos dëmtohen punëtorët amerikanë dhe që Amerika të vihet e para,” tha Tragesser.

Trump ka shprehur mbështetje për lejimin e disa emigrantëve të kualifikuar të hyjnë në SHBA për të punuar në industri kyçe dhe për të trajnuar punëtorë amerikanë, një qëndrim që e ka vënë atë në kundërshtim me disa figura brenda partisë së tij, përfshirë ligjvënësen e linjës MAGA, Marjorie Taylor Greene nga Xhorxhia.

Administrata e tij ka kërkuar të kufizojë emigracionin në përgjithësi, duke ndjekur një axhendë agresive deportimesh masive dhe duke ngushtuar rrugët ligjore për hyrjen në vend—një përpjekje që është intensifikuar javët e fundit pas arrestimit të një shtetasi afgan në lidhje me plagosjen me armë zjarri të dy anëtarëve të Gardës Kombëtare të Uashingtonit, D.C. /Time/