Roja Bregdetare Amerikane ndjek një tjetër cisternë nafte në brigjet e Venezuelës

Zyrtarët e Rojës Bregdetare të SHBA-së thanë të dielën se po gjurmojnë një anije cisternë nafte në ujërat ndërkombëtare pranë Venezuelës, sipas raportimeve të medias, duke shënuar veprimin e dytë të tillë gjatë fundjavës - dhe të tretin brenda javës së kaluar.

Një zyrtar që foli me Reuters, i cili raportoi i pari ndjekjen, tregoi se cisterna është subjekt i sanksioneve, por nuk i dha vendndodhjen e saktë të anijes. Një zyrtar gjithashtu konfirmoi ndjekjen e së dielës për Associated Press dhe tha se ajo përfshinte "një anije të flotës së errët të sanksionuar, që është pjesë e shmangies së paligjshme të sanksioneve nga Venezuela".

Donald Trump kohët e fundit kishte shpallur një “bllokadë”, që synonte të gjitha cisternat e naftës të sanksionuara që udhëtonin drejt ose jashtë Venezuelës.

Fushata e presidentit amerikan për të rritur presionin mbi presidentin autoritar të Venezuelës, Nicolás Maduro, ka përfshirë një prani ushtarake të përforcuar amerikane në rajon, së bashku me më shumë se dy duzina sulme ushtarake kundër anijeve në Oqeanin Paqësor dhe Detin e Karaibeve pranë vendit të Amerikës së Jugut. Këto sulme kanë rezultuar në të paktën 100 vdekje.

Kevin Hassett, drejtori i këshillit ekonomik kombëtar të Shtëpisë së Bardhë, tha të dielën në emisionin Face the Nation të CBS News, se dy kapitenët e parë të marrë në paraburgim kishin operuar ilegalisht dhe kishin furnizuar me naftë vendet nën sanksione.

“Dhe kështu që nuk mendoj se njerëzit duhet të shqetësohen këtu në SHBA se çmimet do të rriten, për shkak të këtyre konfiskimeve të këtyre anijeve”, tha Hassett. “Ka vetëm disa prej tyre – dhe ishin anije të tregut të zi.”

Por, ndërsa konfiskimet rrisin tensionet gjeopolitike, ato ka të ngjarë të rrisin çmimet e naftës kur tregjet aziatike të rihapen të hënën, tha një tregtar nafte për Reuters. Tregtari shtoi se pritjet rreth një përfundimi të mundshëm të luftës në Ukrainë, mund të ndihmojnë në kufizimin e rritjeve të mëtejshme të çmimeve.

Forcat amerikane të shtunën kapën një anije të dytë tregtare, që transportonte naftë pranë brigjeve të Venezuelës në ujërat ndërkombëtare, në mes të një bllokade amerikane kundër naftës së vendit, sipas departamentit të sigurisë kombëtare të administratës Trump.

Kjo ndalesë pasoi sekuestrimin nga forcat amerikane të një tjetër anijeje cisternë nafte në brigjet e Venezuelës më 10 dhjetor. Të dy anijet po shkonin drejt Azisë.

Kur u pyet nëse do të mbështeste një ndryshim regjimi të mbështetur nga SHBA-të në Venezuelë, James Lankford, një senator republikan nga Oklahoma, tha të dielën në emisionin "State of the Union" të CNN: "Epo, po, e mbështes". Lankford tha se Maduro "nuk është udhëheqësi i njohur i Venezuelës" për sa i përket senatorit, gjë që dukej pjesërisht si një aludim për humbjen e dukshme të Maduros në zgjedhjet presidenciale të vitit 2024 ndaj ish-diplomatit Edmundo González.

Zhvillimet vijnë ndërsa Trump dhe këshilltarët e tij kanë refuzuar të përjashtojnë potencialin për konflikt të hapur me Venezuelën, pasi Maduro i ka kërkuar marinës së tij të shoqërojë anijet cisternë të naftës, duke sfiduar flotën më të madhe amerikane të vendosur në rajon në dekada.

Pasi u sekuestrua cisterna e parë e naftës, qeveria venezueliane tha në një deklaratë se SHBA-të kishin kryer “vjedhje flagrante” dhe e përshkroi veprimin si “një akt piraterie ndërkombëtare”.

Në një intervistë të transmetuar të premten në mëngjes, Trump i tha NBC News se lufta me regjimin e Maduros mbetet në tryezë. “Nuk e përjashtoj, jo”, i tha ai rrjetit televiziv në një intervistë telefonike./ The Guardian.