Rusia dhe Bjellorusia po mbajnë kontakte të vazhdueshme me presidentin venezuelian Nicolas Maduro, raporton Reuters, duke theksuar se presioni i shtuar i administratës së presidentit amerikan Donald Trump për largimin e tij po rrit mundësinë që Maduro të kërkojë strehim jashtë vendit.

Sipas burimeve të agjencisë, gjatë një bisede telefonike më 21 nëntor, Maduro i ka thënë Trump-it se ishte i gatshëm të largohej nga Venezuela, me kusht që ai dhe familja e tij të merrnin amnisti të plotë ligjore.

Kremlini konfirmoi se presidenti rus Vladimir Putin ka biseduar të enjten me Maduron, duke i rikonfirmuar mbështetjen për qeverinë venezueliane “për mbrojtjen e interesave kombëtare dhe sovranitetit në kushtet e presionit të jashtëm”.

Zëdhënësja e Ministrisë së Jashtme të Rusisë, Maria Zakharova, deklaroi se Moska shpreson që Shtëpia e Bardhë do të shmangë përshkallëzimin e situatës në një konflikt të plotë, me pasoja të paparashikueshme për Hemisferën Perëndimore.

Ndërkohë, presidenti bjellorus Alexander Lukashenko zhvilloi të enjten takimin e dytë brenda 17 ditësh me ambasadorin venezuelian në Minsk, Jesus Rafael Salazar Velázquez. Sipas agjencisë shtetërore Belta, Lukashenko e ka ftuar Maduron ta vizitojë Bjellorusinë, duke e cilësuar atë “gjithmonë të mirëpritur”.

Lukashenko theksoi se në takimin e tyre të parë ishin dakorduar të “koordinonin çështje të caktuara” në bashkëpunim me Maduron. Ai shtoi se, pas zgjidhjes së këtyre çështjeve, palët do të merrnin “një vendim të përshtatshëm” dhe, nëse do të ishte e nevojshme, do të përfshihej edhe vetë presidenti venezuelian.

Reuters njofton gjithashtu se ka kërkuar komente nga kabineti i Lukashenkës mbi takimet dhe mundësinë që Bjellorusia t’i ofrojë azil Maduros në rast dorëheqjeje, por nuk ka marrë përgjigje.