SHBA sekuestron një tanker pranë Venezuelës, Trump: Është më i madhi i kapur ndonjëherë

Shtetet e Bashkuara kanë sekuestruar një anije të madhe cisternë në ujërat pranë Venezuelës, njoftoi Presidenti amerikan Donald Trump gjatë një deklarate për mediat në Shtëpinë e Bardhë të mërkurën pasdite.

“Siç ndoshta e dini, sapo kemi ndaluar një tanker shumë të madh në brigjet e Venezuelës, ndoshta më i madhi që është sekuestruar ndonjëherë. Do të shihni më shumë për këtë më vonë,” tha Trump, duke theksuar se ndërhyrja është kryer për “një arsye shumë të mirë”.

Prokurorja e Përgjithshme e SHBA-së, Pam Bondi, publikoi më pas pamje nga operacioni, duke e përshkruar anijen si një mjet të madh transporti të naftës së papërpunuar, të dyshuar për lidhje me rrjedha të sanksionuara nga Venezuela dhe Irani. Ajo deklaroi se sekuestrimi është realizuar në bashkëpunim me FBI-në, Departamentin e Mbrojtjes, Departamentin e Sigurisë Kombëtare dhe Rojën Bregdetare.

Ndërkohë, qeveria e Venezuelës e ka cilësuar ndërhyrjen si “pirateri ndërkombëtare”. Presidenti Nicolás Maduro reagoi duke thënë se vendi i tij “nuk do të bëhet kurrë një koloni nafte”, duke akuzuar SHBA-në për agresion të njëanshëm ndaj sovranitetit të Venezuelës.