Plani i paqes Ukrainë-BE, Zelensky: Është gati, së shpejti do t'ia paraqesim SHBA-së

Presidenti i Ukrainës, Volodymyr Zelensky ka deklaruar se Ukraina dhe Evropa janë të gatshme t'i paraqesin SHBA-së hapat e mëtëjshme të paqes. Kjo duke theksuar se Kievi është i përkushtuar ndaj paqes së vërtetë.

"Ne kemi diskutuar tashmë me ekipin negociator rezultatet e punës së djeshme në Londër, e cila u zhvillua në nivelin e këshilltarëve të sigurisë kombëtare të partnerëve tanë evropianë.

Kjo u ra dakord dje në nivelin e udhëheqësve. Po punojmë shumë që hapat drejt paqes të jenë sa më të realizueshëm të jetë e mundur. Së bashku me Shtetet e Bashkuara, presim të ecim përpara sa më shpejt të jetë e mundur", tha përmes një postimi në rrjetet sociale.

Mediat e huaja shkruajnë se në të njëjtën kohë, ai vuri në dukje se përparimi i procesit varet nga gatishmëria e Rusisë për të ndërmarrë masa efektive për t’i dhënë fund luftës dhe për të parandaluar rigjallërimin e armiqësive.

“Gjithçka varet nëse Rusia është e gatshme të ndalojë gjakderdhjen dhe të parandalojë rigjallërimin e luftës. Në të ardhmen e afërt, ne do të jemi gati t’i dërgojmë dokumentet përfundimtare Shteteve të Bashkuara”, përfundoi presidenti ukrainas në postimin e tij.