Aleatët evropianë të Ukrainës kërkojnë më shumë garanci sigurie

Udhëheqësit evropianë kanë thënë se ka ende punë për t'u bërë për të siguruar garanci sigurie për Ukrainën, ndërsa Uashingtoni po shton presionin mbi Kievin për të arritur një marrëveshje paqeje me Rusinë.

Presidenti ukrainas Volodymyr Zelensky u takua të hënën në Londër me kryeministrin e Mbretërisë së Bashkuar Keir Starmer, atë të Francës Emmanuel Macron dhe atë të Gjermanisë Friedrich Merz për të diskutuar versionin e fundit të një plani paqeje, të hartuar gjatë bisedimeve midis zyrtarëve ukrainas dhe amerikanë javën e kaluar.

Pas takimit, Franca tha se puna do të “intensifikohet” për të ofruar garanci sigurie për Kievin.

Të hënën në mbrëmje, Zelensky do të udhëtonte për në Bruksel për t'u takuar me zyrtarët e NATO-s dhe Presidenten e Komisionit Evropian, Ursula von der Leyen.

Përpara bisedimeve që ai priti në Downing Street, Starmer tha se duheshin "garanci të rrepta sigurie" në një marrëveshje paqeje për Ukrainën.

Merz deklaroi se ishte "skeptik" në lidhje me disa nga detajet e planit të mundshëm të paqes që vinte nga pala amerikane. "Por ne duhet të flasim për këtë. Kjo është arsyeja pse jemi këtu", shtoi ai.

Në Kiev dhe në të gjithë Evropën ekziston nervozizëm se SHBA-të mund t’i japin fund mbështetjes për Ukrainën për shkak të zhgënjimit me përparimin e ngadaltë të negociatave. “Nuk mund t’ia dalim pa amerikanët, nuk mund t’ia dalim pa Evropën dhe për këtë arsye duhet të marrim disa vendime të rëndësishme”, tha Zelensky në Londër.

Javën e kaluar, zyrtarët ukrainas kaluan tre ditë me ekipin negociator të SHBA-së në Florida duke nxitur ndryshime në një propozim paqeje të mbështetur nga SHBA-ja, i cili është konsideruar gjerësisht i favorshëm për Rusinë.

Ukraina po kërkon garanci sigurie për të siguruar që në rast të një marrëveshjeje paqeje, Rusia do të dekurajohet nga kryerja e një pushtimi ose sulmi tjetër.

Çështja e koncesioneve territoriale mbetet gjithashtu një pikë ngërçi midis Moskës dhe Kievit. SHBA-të kanë propozuar që Ukraina të tërheqë tërësisht forcat e saj nga rajonet lindore të cilat Rusia është përpjekur t'i marrë me forcë, por nuk ka qenë në gjendje t'i kapë plotësisht, në këmbim të tërheqjes së trupave ruse nga vende të tjera dhe një ndërprerjeje të luftimeve.

Por ky është një opsion i papranueshëm për Zelenskyn, i cili refuzon ta shpërblejë Moskën për agresionin e saj dhe i cili ka paralajmëruar vazhdimisht se Rusia do të përdorë çdo pikëmbështetje në rajonet lindore për të nisur sulme të ardhshme ndaj Ukrainës.

Edhe pse Shtëpia e Bardhë i ka bërë presion Kievit dhe Moskës që të bien dakord shpejt për një plan shumëpikësh për t'i dhënë fund luftës, ka pasur pak shenja të një përparimi.

Një takim pesë-orësh midis të dërguarit të SHBA-së, Steve Witkoff, dhe presidentit rus Vladimir Putin në Moskë javën e kaluar nuk arriti të japë rezultate të prekshme.

Këto bisedime u pasuan nga tre ditë diskutimesh midis kryenegociatorit të Zelensky-t, Rustem Umerov, dhe homologëve të tij amerikanë në Miami, të cilat rezultuan në deklarata të paqarta, por pozitive të "përparimit" nga të dyja palët.

Megjithatë, të dielën Trump akuzoi Zelenskyn se nuk e kishte lexuar draftin e marrëveshjes së rishikuar të paqes.

“Jam pak i zhgënjyer që Presidenti Zelensky nuk e ka lexuar ende propozimin”, tha ai, ndërsa këmbënguli se Vladimir Putin i Rusisë ishte “dakord me të”.

Pothuajse njëkohësisht, Zelensky deklaroi se priste të informohej mbi negociatat nga Umerovi qoftë në Londër ose në Bruksel të hënën. "Disa çështje mund të diskutohen vetëm ballë për ballë", tha ai.

Bisedimet në Londër ishin përpjekja e fundit nga aleatët evropianë të Ukrainës për të përcaktuar një rol në përpjekjet e udhëhequra nga SHBA-të për t'i dhënë fund luftës, të cilën ata kanë frikë se do të dëmtojë interesat afatgjata të kontinentit në favor të një zgjidhjeje të shpejtë.

Pavarësisht presionit të konsiderueshëm ekonomik dhe humbjeve të vazhdueshme në fushëbetejë, Kremlini ka treguar pak shenja se është i gatshëm të bëjë kompromis mbi kërkesat e tij kryesore, duke përfshirë përjashtimin e çdo rruge të ardhshme për Ukrainën që t'i bashkohet aleancës ushtarake të NATO-s.

Javën e kaluar, Putini riafirmoi gjithashtu gatishmërinë e tij për të vazhduar luftimet derisa forcat e tij të marrin kontrollin e plotë të rajoneve të Donetskut dhe Luhanskut, 85% e të cilave aktualisht është e pushtuar nga ushtria ruse.

Ndërsa bisedimet në SHBA dhe Evropë vazhdojnë, ashtu vazhdon edhe lufta.

Midis të dielës dhe të hënës, gjithsej 10 persona u vranë dhe 47 u plagosën, ndërsa forcat ruse sulmuan nëntë rajone duke përdorur dronë, bomba rrëshqitëse dhe raketa.

Pushtimi në shkallë të plotë i Ukrainës nga Rusia filloi në shkurt të vitit 2022. Që atëherë, mijëra civilë dhe ushtarë janë vrarë ose plagosur, me qytetet e Ukrainës që vazhdojnë të sulmohen pothuajse çdo natë.