Shkencëtarët po paralajmërojnë se mjetet ekzistuese dhe ato në zhvillim të inteligjencës artificiale mund të përdoren teknikisht për të krijuar armë biologjike të afta për të shkaktuar një pandemi.

Më herët këtë vit, disa nga specialistët kryesorë të teknologjisë dhe antiterrorizmit në botë zhvilluan një skenar hipotetik të një pandemie globale të shkaktuar nga një lloj i ri i enterovirusit, i krijuar qëllimisht nga një grup ekstremist duke përdorur inteligjencën artificiale, raporton Euronews.

Edhe pse një skenar i tillë tingëllon një roman fantastiko-shkencor, një grup prej 14 specialistësh e konsideron mjaft të mundshëm. Pandemia fiktive, të cilën simulimi parashikoi se do të rezultonte në 850 milionë raste dhe 60 milionë vdekje në të gjithë botën, u konsiderua “thellësisht shqetësuese dhe e denjë për veprim urgjent për ta parandaluar”, tha raporti mbi diskutimet.

Një grup ekspertësh i mbledhur në muajin shkurt nga Iniciativa e Kërcënimit Bërthamor dhe Konferenca e Sigurisë së Munihut, paralajmëruan se evolucioni i shpejtë i inteligjencës artificiale po “shkatërron pengesat për zhvillimin e armëve biologjike nga aktorë keqdashës”.

Këto kërcënime nuk janë shumë larg, përfundoi grupi. Teknikisht do të ishte e mundur të përdoren mjetet biologjike ekzistuese dhe në zhvillim të mundësuara nga inteligjenca artificiale për të krijuar patogjenë të rinj me rreziqe të nivelit të pandemisë. Për më tepër, masat aktuale të sigurisë u konsideruan të papërgatitura për t’iu përgjigjur këtyre kërcënimeve.

Ata bënë thirrje për bashkëpunim më të madh midis liderëve globalë për të vlerësuar dhe për t’iu përgjigjur kërcënimeve biologjike të nxitura nga inteligjenca artificiale.