Plani i Paqes/ Zelensky: Takime në SHBA me të dërguarit e Trump! Kremlini: Putin s’e hodhi poshtë!

Presidenti Volodymyr Zelensky, ka konfirmuar se delegacioni ukrainas do të përgatitet për një takim me të dërguarit e Trump në SHBA, pasi ministrat e jashtëm të takohen në Bruksel.

Ndërsa ndodhet në Bruksel, delegacioni ukrainas - i përbërë nga Sekretari i Sigurisë Kombëtare Rustem Umerov dhe Shefi i Shtabit të Përgjithshëm të Forcave të Armatosura Andrii Hnatov - do t'i informojë homologët e tyre evropianë mbi bisedimet e Moskës dhe do të diskutojë "arkitekturën e nevojshme të sigurisë", thotë Zelensky.

"Si gjithmonë, Ukraina do të punojë në mënyrë konstruktive, në ndjekje të një paqeje të vërtetë", shkruan Zelensky në mediat sociale.

Nga na tjetë, zëdhënësi i Kremlinit, Dmitry Peskov, tha se “nuk do të ishte korrekte” të thuhej se Presidenti Putin hodhi poshtë propozimet e SHBA-së për paqe, gjatë bisedimeve me Steve Witkoff dhe Jared Kushner dje.

Duke iu përgjigjur një pyetjeje në një konferencë të përditshme për shtyp, Peskov thotë: “Dje ishte hera e parë që u zhvillua një shkëmbim i drejtpërdrejtë mendimesh. Diçka u pranua, diçka u shënua si e papranueshme. Ky është një proces normal pune dhe një kërkim për kompromis.”

Peskov gjithashtu refuzoi të zbulonte ndonjë detaj të negociatave pesë-orëshe në Kremlin: "Ekziston një mirëkuptim se sa më qetësi të mbretërojë kjo negociatë, aq më produktive janë ato. Ne do t'i përmbahemi këtij parimi dhe shpresojmë që edhe homologët tanë amerikanë ta bëjnë këtë."

Javën e kaluar pamë një sërë rrjedhjesh mediatike që sugjeronin se amerikanët u përpoqën të paraqisnin një listë maksimaliste kërkesash të përpiluara nga Rusia, si "planin e tyre të paqes", se SHBA-të kanë qenë të përfshira në bisedime sekrete biznesi me Rusinë dhe se Witkoff i këshilloi rusët se si t'i afroheshin Donald Trumpit./ BBC.