Pas takimit SHBA-Ukrainë në Florida, Putin pret të martën të dërguarin special të Trump

I dërguari special i Presidentit Donald Trump, Steve Witkoff, do të udhëtojë për në Moskë të hënën për t'i paraqitur Presidentit rus Vladimir Putin një propozim për planin e paqes, në atë që pritet të jetë një provë vendimtare për përpjekjet e administratës Trump për t'i dhënë fund luftës në Ukrainë.=

Një takim midis Presidentit rus Vladimir Putin dhe të dërguarit të posaçëm presidencial të SHBA-së, Steve Witkoff, është planifikuar për pasditen e 2 dhjetorit, tha zëdhënësi i Kremlinit, Dmitry Peskov, për gazetarët.

"Po, takimi me Witkoff është planifikuar vërtet për nesër. Ai vetë e përmendi këtë dje", u përgjigj zëdhënësi në një pyetje mbi këtë çështje, duke specifikuar se bisedimet do të zhvilloheshin pasdite.

“Presidenti do të zhvillojë gjithashtu disa takime me dyer të mbyllura sot në përgatitje të kontakteve Rusi-SHBA të nesërme”, shtoi Peskov.

Witkoff po udhëton për në Putin një ditë pasi mori pjesë në bisedime me një delegacion të nivelit të lartë ukrainas në Florida, që synojnë gjetjen e një marrëveshjeje për t'i dhënë fund luftës që Ukraina dhe Rusia mund ta pranojnë.

Ka pak pritshmëri që Putini do të bjerë dakord për një marrëveshje. Udhëheqësi rus ka sinjalizuar tashmë se nuk do të bëjë kompromis, duke bërë vërejtje të ashpra javën e kaluar  ku përsëriti kërkesat e tij që Ukraina të tërhiqet nga territori që ai pretendon dhe duke thënë se është "e pakuptimtë" të negociojë me Presidentin ukrainas Volodymyr Zelenskyy. Ai sugjeroi që Kremlini beson se po bën përparim të mjaftueshëm në fushën e betejës dhe është i kënaqur të presë derisa Kievi të pranojë kushtet e tij.  

Zelenskyy pritet të jetë në Paris sot për t'u takuar me Presidentin Francez Emmanuel Macron, me të cilin pritet të diskutojë negociatat me SHBA-në. Zelenskyy dhe Evropa duket se po sinjalizojnë solidaritet në një ditë kur SHBA-të dhe Putini pritet të dominojnë valët e televizionit. 

Zelenskyy tha të dielën se emisarët e tij në Florida kishin raportuar "parametrat kryesorë" të asaj që ishte diskutuar, së bashku me "disa rezultate paraprake". Por detajet e plota ende nuk janë transmetuar, tha ai.

"Pres me padurim të marr një raport të plotë nga ekipi ynë gjatë një takimi personal", tha Zelenskyy në rrjetet sociale.

Sekretari i Shtetit i SHBA-së, Marco Rubio, tha të dielën, pasi mori pjesë në bisedimet me Ukrainën, se hapat e ardhshëm në negociata ishin "delikatë", duke shtuar se "është e ndërlikuar, ka shumë pjesë lëvizëse".

Kishte "një palë tjetër të përfshirë këtu që do të duhet të jetë pjesë e ekuacionit -- dhe kjo do të vazhdojë më vonë këtë javë kur z. Ëitkoff të udhëtojë për në Moskë, megjithëse ne kemi qenë në kontakt në shkallë të ndryshme edhe me palën ruse", tha Rubio. 

"Ne gjithashtu i kuptojmë mjaft mirë pikëpamjet e tyre", tha Rubio. 

Zyrtarët nga Ukraina dhe Shtetet e Bashkuara thanë se takimi rreth 2-orësh në fushën e golfit Shell Bay në Hallandale Beach  ishte produktiv, por asnjëra palë nuk dha detaje rreth marrëveshjeve të arritura  dhe nuk ka asnjë indikacion se është arritur ndonjë përparim në çështjet më të vështira që do të lejonin përfundimin e luftës.

Në takim u diskutua një plan paqeje i rishikuar prej 19 pikash, i cili u zhvillua një javë më parë gjatë një raundi tjetër negociatash në Gjenevë midis SHBA-së dhe Ukrainës. Këto bisedime ripërpunuan një plan të mëparshëm prej 28 pikash që administrata Trump kishte paraqitur dhe që kishte alarmuar Kievin dhe aleatët evropianë, pasi favorizonte shumë Rusinë.

Zyrtarët të dielën nuk publikuan detaje nëse propozimi ishte përditësuar përsëri.

Një burim i njohur me bisedimet tha se ata kishin diskutuar garancitë e sigurisë për Ukrainën, si dhe fatin e miliarda dollarëve të aseteve ruse të ngrira nga vendet perëndimore dhe zgjedhjet e mundshme në Ukrainë. Çështja e aseteve të ngrira ishte një çështje "kyçe" për rusët, tha burimi.

Megjithatë, për çështjen thelbësore, atë të kërkesës së Rusisë që Ukraina të dorëzojë territorin e papushtuar në rajonin e Donbasit, nuk pati shenja përparimi. Burimi tha se Rusia ende nuk ishte e gatshme të diskutonte ndonjë formë armëpushimi dhe Ukraina nuk është e gatshme të lëshojë territor.

Rubio tha se bisedimet kishin qenë "një seancë shumë produktive dhe e dobishme ku u bë përparim shtesë". 

"Mendoj se ekziston një vizion i përbashkët këtu se kjo nuk ka të bëjë vetëm me përfundimin e luftës, gjë që është shumë e rëndësishme; ka të bëjë me sigurimin e së ardhmes së Ukrainës, një të ardhme që shpresojmë të jetë më e begatë se kurrë më parë", u tha ai gazetarëve pasi doli nga bisedimet me Rustem Umerov, sekretarin e Këshillit të Sigurisë dhe Mbrojtjes Kombëtare të Ukrainës, i cili kishte qenë negociatori kryesor nga Kievi. 

"Ne punuam -- patëm tashmë një takim të suksesshëm në Gjenevë dhe sot e vazhduam këtë sukses", tha Umerov, duke shtuar se do të ketë "faza të mëvonshme" të bisedimeve./ ABC News.