FOTOLAJM/ Zjarri masiv në Hong Kong, 36 të vdekur, qindra të bllokuar. Vazhdojnë përpjekjet për të fikur flakët

Një zjarr masiv ka përfshirë kompleksin banesor Wang Fuk Court në lagjen Tai Po të Hong Kongut të mërkurën, duke ngritur tym të zi mbi qytet dhe duke shkaktuar panik te banorët. Flakët kanë përfshirë tetë ndërtesa me 32 kate secila dhe rreth 2,000 apartamente, ndërsa zjarrfikësit përpiqen të përmbajnë zjarrin vertikal dhe të shpëtojnë banorët e bllokuar.

Sipas autoriteteve, të paktën 36 persona kanë humbur jetën, 279 të tjerë rezultojnë të zhdukur, ndërsa 29 janë dërguar në spital, shtatë prej të cilëve në gjendje kritike. Pamjet e flakëve dhe tymit që mbulon horizontin kanë bërë xhiron e mediave ndërkombëtare, duke treguar shkallën e katastrofës.

Zjarrfikësit përdorën tuba uji dhe shkallë nga kamionët, por rënia e mbeturinave dhe skelat e bambusë, që mbulonin ndërtesat për riparime, e vështirësuan ndjeshëm operacionin. Në operacion janë angazhuar 767 zjarrfikës, 128 automjete zjarrfikëse, 57 ambulanca dhe 400 oficerë policie.

Shkaku i zjarrit ende nuk është bërë publik, por përdorimi i skelave prej bambuje ka qenë identifikuar edhe në zjarre të mëparshme si faktor që përshpejton përhapjen e flakëve. Autoritetet lokale kanë hapur strehimore të përkohshme në qendrat komunitare dhe një shkollë për të strehuar banorët e zhvendosur.

Xi Jinping, udhëheqësi i Kinës, kërkoi “përpjekje të gjithanshme shpëtimi për të minimizuar humbjet” dhe udhëzoi agjencitë kombëtare të ndihmonin autoritetet lokale. Ai premtoi gjithashtu ndihmë për rindërtimin dhe mbështetjen e mbijetuesve.

Zjarrfikësit po punojnë pa pushim për të kontrolluar flakët, ndërsa qyteti mbahet në alarm të lartë. Pamjet dramatike tregojnë ndërtesa të ndriçuara nga flakët portokalli dhe tym të dendur që ngrihet mbi Tai Po, duke lënë pas një tablo tragjike të humbjeve dhe shkatërrimeve.