Agjentët doganorë kanë sekuestruar drogë me vlerë më shumë se 10 milionë dollarë të fshehur brenda një dërgese me sallatë jeshile në kufirin SHBA-Meksikë. Agjentët doganorë gjetën 500 pako metamfetaminë brenda perimeve. Droga ishte në një kamion, i cili po përpiqej të kalonte Urën Rio Grande në Teksas.

Mediat e huaja shkruajnë se trafikantët e drogës janë përpjekur të kontrabandojnë sasi të mëdha droge në Shtetet e Bashkuara në të kaluarën në dërgesa frutash dhe perimesh. Në gusht, rreth një ton metamfetaminë u gjet në një dërgesë me selino në Gjeorgji.

Zbulimi i ngarkesës vjen në mes të një fushate të qeverisë amerikane kundër trafikantëve të drogës nga Amerika e Jugut. Më shumë se 80 persona janë vrarë në sulmet e SHBA-së ndaj anijeve të dyshuara për kontrabandë droge nga Amerika e Jugut në Shtetet e Bashkuara.